Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 428 Hüküm no: 571 Orijinal metin no: [94b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Varisi olmayanların terekesinin miriye ait olduğuna dair ferman sureti Mefâhirü’l-kuzât ve’l-hükkâm me‘âdinü’l-fazl ve’l-kelâm Vize ve Kırkkilise’nin kādılar -zîde fazluhüm- tevkī‘-i refî‘-i hümâyûn vâsıl olıcak ma‘lûm ola ki Dergâh-ı âlî çavuşu olup Vize ve tevâbi‘i mukāta‘asına emîn olan Mehmed Çavuş -zîde kadruhû- Dersa‘âdet’ime arz su[nup] zikr olunan kadılıklarda hâric ez-defter olup âhar diyârdan gelip mürd olanların metrûkâtı mîrîye âid olmağla iltizâmım mûcebince kabz eylemek istediğimde ba‘zı kimesneler ol makūle mürd olanların vârisiyiz deyû bana dahl ettirmeyip mâl-ı mîrîye bu sebeb ile gadr ve şart-ı iltizâmıma ke[sr] müterettib olmuşdur men‘ olunup ol makūle mürd olan haymananın maskat-ı re’s olan vârisleri nakl-i şehâdet-i şer‘iyye getirmeyince dahl ettirilmeyip ve hâlâ Ereğli’de mürd olan zimmînin da[hi] maskat-ı re’sinden vâris olanlar nakl-i şehâdet-i şer‘iyye getirmeden âhardan kuzât ve nüvvâb dahl eylemeyip mîrî için zabt olunmak bâbında emr-i şerîf recâ etmeğin şart-ı iltizâmı mûcebince amel olunmak emr edip buyurdum ki hükm-i şerîfim vardıkda husûs-ı mezbûra mukayyed olup göresiz fi’l-vâki‘ kaziyye i‘lâm olunduğu gibi ise ol makūle âhar diyârdan gelip zikr olunan kadılıklarda hâric ez-defter olan haymana re‘âyâdan mürd olanların yanlarında vâris-i ma‘rûfu olmayanların vâki‘ olan metrûkâtları emîn-i mezbûra şart-ı iltizâm mûcebince mîrî için zabt ve kabz ettirip mâdemki maskat-ı re’sinde vârisleri nakl-i şehâdet-i şer‘iyye getirmeden ol vechile vâris da‘vâsın edenleri dahl ettirmeyesiz ve hâlâ Ereğli’de mürd olan zimmînin dahi mevcûd metrûkâtını maskat-ı re’sinde vârisi zuhûr eyleyip nakl-i şehâdet-i şer‘iyye getirmeyince emîn-i mezbûra mîrî için kabz ettirip hilâf-ı şer‘ ve kānûn ve mugāyir-i şart-ı iltizâm ve emr-i hümâyûn kuzât ve nüvvâb ve âhardan bir ferdi dahl ve ta‘arruz ettirmeyip mîrî için emîn-i mezbûra kabz ettirip ba‘zı vilâyetde vârisi zuhûr eyledikde cânib-i mîrîden alıp ne malıma gadr ve zarar ve ne kimesneye hilâf-ı şer‘-i şerîf zulm ve te‘addî ettirmeyesiz şöyle bilesiz alâmet-i şerîfe-i i‘timâd kılasız. Tahrîren fi’l-yevmi’s-sâlis ve’l-ışrîn min Zilka‘deti’ş-şerîfe min şühûr li sene tis‘a ve ışrîn ve elf. Be makām-ı Kostantıniyye el-mahrûse. Vasale ileynâ fi’l-yevmi’l-hâmis ve’l-ışrîn min Zilka‘deti’ş-şerîfe li târihi’l-mezbûr.