Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 428 Hüküm no: 572 Orijinal metin no: [94b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zimmî reayanın hamr vergisine tabi oldukları Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn vârisü ulûmi’l-enbiyâ’i ve’l-mürselîn hüccetü’l-hakkı ale’l-halkı ecma‘în, el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâilühû- tevkī‘-i refî‘-i hümâyûn vâsıl olıcak ma‘lûm ola ki kazâ-i mezbûra tâbi‘ kurâda sâkin olan zimmîlerden ba‘zıları re‘âyâsıyız ve kimi dahi sultânların re‘âyâsıyız ve ba‘zısı dahi şâhinci ve doğancıyız deyû zimmetlerine lâzım gelen rüsûm-ı hamrı vermeyip ta‘allül ve inâd üzre oldukları i‘lâm olunup imdi anın gibi zimmî tâifesi her ne olursa olsun rüsûm-ı hamrdan mu‘âf olmazlar deyû bu bâbda mâliye tarafından verilen emr-i şerîf mûcebince amel olunmak emr edip buyurdum ki ( ) vusûl buldukda vech-i meşrûh üzre mâliye tarafından verilen emr-i şerîf mûcebince amel edip min ba‘d ol emr-i hümâyûnuma muhâlif mezkûrlara ol vechile ta‘allül ve bahâne ettirmeyip zimmetlerine lâzım gelen rüsûm-ı hamrı bî-kusûr cem‘ ettirip zimmetlerinde bir akçe ve bir habbe bâkī alıkomayasız şöyle bilesiz alâmet-i şerîfe i‘timâd kılasız. Tahrîren fî evâhiri şehri Zilhicceti’ş-şerîfe sene tis‘a ve ışrîn ve elf mine’l-hicreti’n-Nebeviyye aleyhi efdalü’t-tahiyye. Be makām-ı Kostantıniyye el-mahrûse.