Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 429 Hüküm no: 573 Orijinal metin no: [94b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın evini Ali Beşe b. Ahmed’e satıp tarlasının da tasarruf hakkını devretmesi Vilâyet-i Rumeli’nde Mora sancağında Gördös kazâsına tâbi‘ Londi nâm karye sâkinlerinden fahrü’l-akrân Mehmed Beşe b. Abdullah nâm kimesne meclis-i şer‘-i mutahharda, işbu bâ‘isü’l-kitâb iftihârü’l-emâsil ve’l-a‘yân Ali Beşe b. Ahmed nâm kimesne mahzarında ikrâr ve takrîr-i kelâm edip karye-i mezbûrede vâki‘ bir tarafdan Ayas b. Hüseyin mülküne ve bir tarafdan Mehmed Bey b. Sinan mülküne ve iki tarafdan tarîk-i âma müntehî ve mahdûd bir ahırı ve havluyu ve harman yerini müştemil mülk menzilimi cümle-i tevâbi‘ ve levâhıkı ile mûmâ-ileyh Ali Beşe’ye bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eylediğimden sonra yine karye-i mezbûre sınırı dâhilinde vâki‘ lede’l-ahâlî ma‘lûmü’l-hudûd tahmînen otuz dönüm on kıt‘a tarlanın hakk-ı tasarrufunu sâhib-i arz ma‘rifetiyle müşârün-ileyh Ali Beşe’ye tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan üç bin nakd-i mezbûrü’n-na‘t akçeyi bi’t-tamâm ve’l-kemâl ahz ve kabz eyledim ba‘de’l-yevm zikr olunan menzil merkūmun mülk-i müşterâ-yı sarîhidir ve mârrü’z-zikr on kıt‘a tarla dahi mersûmundur sâir emsâli tasarrufu gibi mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm vicâhen tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’t-tâsi‘ aşer min Zilhicce li sene tis‘a ve ışrîn ve elf. Şuhûdü’l-hâl: Ramazan Ağa, Mehmed Bey kürkçü, Mustafa Bey el-Cündî ve gayruhüm.