Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 437 Hüküm no: 585 Orijinal metin no: [96b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eynehan b. Kasım’ın bahçe ve bostan hissesini Hasan b. Eyne’ye satıp tarlalarının da tasarruf hakkını devretmesi Vilâyet-i Rumeli’nde Mizistre kazâsına tâbi‘ Durdeviçe? nâm karyeden Eynehan b. Kasım mahfil-i kazâda işbu hâmilü’l-kitâb Hasan b. Eyne muvâcehesinde ikrâr ve takrîr-i kelâm edip karye-i mezbûrede vâki‘ lede’l-ahâlî ma‘lûmü’l-hudûd Kurd b. Abdullah nâm kimesneden iştirâ ettiğim bir kıt‘a bahçeden ve bir kıt‘a bostandan nısf hisse-i şâyi‘ini cümle-i tevâbi‘ ve levâhıkı ve âmme-i menâfi‘ ve merâfıkı ile mezbûr Hasan’a beş yüz nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît ettikden sonra yine karye-i mezbûre sınırı dâhilinde vâki‘ lede’l-ahâlî ma‘lûmü’l-hudûd on kıt‘a tarladan nısfının hakk-ı tasarrufunu sâhib-i arz ma‘rifetiyle mezbûr[a] tefvîz edip ol dahi minvâl-i muharrer tefevvüz ve kabûl ettikden sonra mukābele-i tefvîzde olan yedi yüz nakd-i mezbûrü’n-na‘t akçeyi mezbûr Hasan yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan bahçeden ve bostandan nısf hisse-i şâyi‘i mezbûr Hasan’ın mülk-i müşterâ-yı sarîhidir ve mârrü’z-zikr on kıt‘a tarladan nısfının hakk-ı tasarrufu merkūmundur, sâir emsâli tasarrufu gibi mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Hasan bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Şuhûdü’l-hâl: Mehmed Ağa b. Aydın, Ali Bey b. Mustafa, Bayram b. Mustafa, Hüseyin Bey b. Hasan, Osman [b.] İlyas, Hüseyin b. Abdullah, Süleyman [b.] Mehmed.