Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 438 Hüküm no: 586 Orijinal metin no: [96b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Minho v. Yani’nin zeytin ağaçlarını Zoto v. Nika’ya satması Vilâyet-i Rumeli’nde Delvine kazâsına tâbi‘ Gardik nâm karyeden Minho v. Yani nâm zimmî mahfil-i kazâda işbu bâ‘isü’l-kitâb Zoto v. Nika muvâcehesinde ikrâr ve takrîr-i kelâm edip karye-i Lobine’de sâkin Niko v. Vaşo nâm zimmîden iştirâ eylediğim lede’l-ahâlî ma‘lûmü’l-hudûd dört dip zeytin eşcârını cümle-i tevâbi‘ ve levâhıkı ile mezbûr Zoto’ya yedi yüz nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm zikr olunan dört dip zeytin eşcârı merkūm Zoto’nun mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr bi’l-muvâcehe tasdîk edicek mâ hüve’l-vâki‘ bi’t-taleb ketb [olundu]. Şuhûdü’l-hâl: Mustafa b. Mehmed, Perviz b. Abdullah, Yakub [b.] Kurd, Hristo [v.] Yani, Hristo [v.] Dimo, Pano [v.] Yano, Papa [v.] Dimo, Yani [v.] Minho, Yani [v.] Pasko, Yani [v.] Kondi ve gayruhüm.