Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 439 Hüküm no: 588 Orijinal metin no: [96b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çelebi b. Hasan’ın Apostol v. İstati ile sulh olması Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Çavuş Kasım mahallesinde sâkin fahrü’l-eşbâh Hüseyin Çelebi b. Hasan nâm râcil meclis-i şer‘de işbu hâmilü’l-kitâb Apostol v. İstati nâm zimmî muvâcehesinde ikrâr ve takrîr-i kelâm edip mahmiye-i Kostantıniyye hısnı ebvâbından Edirnekapısı hâricinde Selhâne kurbunda vâki‘ lede’l-ahâlî ma‘lûmü’l-hudûd tahmînen tûlen on zirâ‘ ve arzen beş zirâ‘ arz-ı hâliyeye bi gayrı vech-i şer‘î mezbûr Apostol müdâhale edip tasarruf etmekle beynimizde münâza‘ât-ı kesîre ve muhâsamât-ı ekîde vâkı‘a olmuşidir el-hâletü hâzihî beynimize muslihûn tavassut edip iki bin nakd-i râyic fi’l-vakt akçe üzre beni akd-i sulh inşâ ettiklerinde ben dahi sulh-i mezbûru kabûl ve bedel-i sulh olan meblağ-ı mersûm [97a] iki bin akçeyi mersûm Apostol yedinden bi’t-tamâm ve’l-kemâl ahz ve kabz edip husûs-ı mezbûra müte‘allik da‘vâ ve nizâ‘dan zimmetini ibrâ-i âm ile ibrâ ve iskāt-ı tâm ile iskāt eyledim ba‘de’l-yevm husûs-ı mezbûra müte‘allik bi’z-zât veya bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm Apostol vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fî 12 mine’l-Muharremi’l-harâm li sene selâsîn ve elf. Şuhûdü’l-hâl: Hüseyin Çelebi b. Hasan el-Cündî Hasan b. İlyas, Mustafa Beşe b. Abdullah er-Râcil.