Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 439 Hüküm no: 589 Orijinal metin no: [97a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Agalo v. Preşkova’nın bağını Yani v. Yorgaki’ye satması Vilâyet-i Rumeli’nde Mora sancağında nefs-i kazâ-i Gördös sâkinlerinden Agalo v. Preşkova nâm zimmî meclis-i şer‘-i mutahharda, işbu bâ‘isü’l-kitâb Yani v. Yorgaki nâm zimmî mahzarında ikrâr ve takrîr-i kelâm edip kasaba-i merkūme bağları dâhilinde vâki‘ bir tarafdan Atanaş v. Preşkova bağına ve bir tarafdan bâyi‘-i merkūm bağına ve bir tarafdan Nikola v. ( ) bağına ve bir tarafdan Yorgo v. Dirak bağına müntehî tahmînen iki dönüm bir kıt‘a Fetiya demekle ma‘rûf mülk bağımı cümle-i tevâbi‘i ile mezbûr Yani’ye dört bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bağ-ı merkūm Yani’nin mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm Yani vicâhen tasdîk edicek mâ hüve’l-vâki‘ bi’t-taleb ketb olundu. Şuhûdü’l-hâl: Diyoso v. Lugo, Dimo v. Nikola, Vasil v. Piroho, Hristo v. İstemad.