Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 440 Hüküm no: 591 Orijinal metin no: [97a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ergiri v. Todori’nin bağını Ergiri v. Rizo’ya satması Vilâyet-i Rumeli’nde İnebahtı sancağında Yenişehir kazâsı müzâfâtından Fener nâhiyesine tâbi‘ Komeryan nâm karye sâkinlerinden Ergiri v. Todori nâm zimmî meclis-i şer‘-i şerîfde işbu hâmilü’l-kitâb Ergiri v. Rizo mahzarında ikrâr ve takrîr-i kelâm edip karye-i mezbûre bağları dâhilinde vâki‘ bir tarafdan Dimo v. Apostol bağına ve bir tarafdan Yorgi v. Şimo bağına ve bir tarafdan Apostol v. Mosik bağına ve bir tarafdan müşterî-i mezbûr bağına müntehî tahmînen iki dönüm bir kıt‘a mülk bağımı cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûr Ergiri’ye bin üç yüz elli altı nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bağ merkūm Ergiri’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrin el-mukarru lehü’l-merkūm Ergiri vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fî 22 mine’l-Muharremi’l-harâm sene selâsîn ve elf. Şuhûdü’l-hâl: Hristo v. Pavlo, Hristo v. Apostol, Yako v. Rizo, Dimo v. Apostol.