Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 200 Hüküm no: 180 Orijinal metin no: [23b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cemile Hatun bt. Mustafa’nın, Mehmed b. Abdullah’ı hırsızlıkla suçladığı ancak ispat edemediği Mahmiye-i İstanbul’da Avcı Bey mahallesinde sâkine Cemile Hâtun bt. Mustafa meclis-i şer‘-i hatîr-i lâzımü’t-tevkīrde bâ‘isü’l-vesîka Mehmed b. Abdullah nâm kimesne mahzarında üzerine da‘vâ ve takrîr-i kelâm edip mezbûr Mehmed târih-i kitâbdan on beş gün mukaddem gece ile sâkine olduğum menzilimin duvarından aşıp içeriye girip eşyâ-i memlûkemden on iki sahan ve iki kahve ibriği ve altı tencere ve bir leğen ve bir ibriğimi ahz etmişidi hâlâ eşyâ-i mezkûreyi merkūm Mehmed’den taleb eder[im] suâl olunsun dedikde gıbbe’s-suâl ve’l-inkâr müdde‘iyye-i mezkûreden müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ târih-i mezkûrda müdde‘iyye-i mezbûrenin mahalle-i mezkûrede sâkine olduğu menzili duvarından gece ile aşıp menzil-i mezbûrun içinde mevcûd olan eşyâ-i memlûkesinden on iki sahan ve iki kahve ibriği ve altı tencere ve bir leğen ve bir ibriğini ahz u kabz etmediğine merkūm Mehmed’e yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince bilâ-beyyine ve bî-vech mu‘ârazadan mezbûre Cemile Hâtun men‘ olunup mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cemâziyelevvel li sene 1077. Şuhûdü’l-hâl: Musa Beşe b. ( ), Mustafa Çelebi b. Ahmed, Hasan Çelebi b. Mehmed, İbrahim Çelebi b. Mehmed.