Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 200 Hüküm no: 181 Orijinal metin no: [24a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihalaki v. Hristodoki ve Kasandra’nın, Zağarcıbaşı Hüseyin Ağa’ya olan borçları karşılığı bahçe ve evlerini rehin verdikleri Mahmiye-i İstanbul hısnı ebvâbından Balatkapısı dâhilinde Mustafa Paşa-yı Atîk mahallesi sükkânından olup kendi tarafından asîl ve li ebeveyn kız karındaşı Kasandra nâm nasrâniye tarafından emlâk-i âtiyyetü’z-zikrden hissesini rehne ve asl-ı deyn olan bin iki yüz kıt‘a esedî guruşa kefâlete ikrâra vekîl olduğu zâtını ma‘rifet-i şer‘iyye ile ârifûn olan hatîb İsmail Efendi b. Mehmed ve İbrahim Çelebi b. Mustafa ve el-Hâc Mustafa b. Ali nâm kimesneler şehâdetleriyle şer‘an sâbit olan Mihalaki v. Hristodoki nâm zimmî meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda sâbıkan zağarcıbaşı olan umdetü’l-emâcid ve’l-ekârim Hüseyin Ağa b. Sinan tarafından husûs-ı câ’i’l-beyâna nehc-i şer‘î ve tarîk-i mer‘î üzre sâbitü’l-vekâle vekîl olan Mustafa Çelebi b. Abdullah nâm kimesne mahzarında ikrâr ve takrîr-i kelâm edip müvekkil-i mûmâ-ileyh Hüseyin Ağa’ya cihet-i karzdan bin kıt‘a esedî guruş ve yedinden müşterâ ve makbûz semeni târih-i kitâbdan bir sene tamâmına değin müeccel ve mev‘ûd her bir zirâ‘ı dörder esedî guruşa olmak üzre elli zirâ‘ iskarlet çuka semeninde iki yüz kıt‘a esedî guruş cem‘an bin iki yüz kıt‘a esedî guruş deynim olup mukābelesinde sülüsânı benim ve sülüsü kız karındaşım müvekkile-i mezbûre Kasandra’nın olan mahalle-i mezbûrede vâki‘ iki tarafdan tarîk-i âm ve bir tarafdan İbrahim Halîfe menzili ve bir tarafdan ba‘zen Bayram Paşa vakfı ve ba‘zen Yamandi v. Dimo ve Kiro v. Toma mülkleri ile mahdûd etrâf-ı erba‘adan taş duvarı ve bir kasab dükkânını müştemile mülk hadîkamızı ve yine mahalle-i mezbûrede vâki‘ bir tarafdan Duka v. Todoraki ve bir tarafdan Petro v. Yorgi ve iki tarafdan tarîk-i âm ile mahdûd şehnişînli fevkānî bir oda ve bir [so]fa ve bir su kuyusu ve bir kenîfi müştemil mülk menzilimizi ve yine bâb-ı mezkûre dâhilinde Hacı İsa mahallesinde vâki‘ bir tarafdan tarîk-i hâs ve bir tarafdan tarîk-i âm ve bir tarafdan Fotini nâm zimmî mülkü ve bir tarafdan kilise vakfı menzili ile mahdûd fevkānî iki oda ve bir ahır ve bir su kuyusu ve hadîka ve bir kenîfi müştemil mülk menzilimizi kız karındaşım müvekkile-i mezbûre Kasandra’nın izniyle fâriğan ani’ş-şevâgil müvekkil-i mûmâ-ileyh Hüseyin Ağa’ya rehn vaz‘ ve teslîm edip ol dahi irtihân ve kabz ve tesellüm eylediğinden sonra asl-ı deyn-i mezbûr bin iki yüz kıt‘a esedî guruşa emr ve kabûlü hâviye kefâlet-i sahîha-i şer‘iyye ile kız karındaşım müvekkile-i mezbûre Kasandra kefîl oldu dedikde gıbbe’t-tasdîki’ş-şer‘î meclis-i mezbûrda mahmiye-i mezbûrede sâkin Yahudi tâifesinin Zeytun cemâ‘atinden olup zikr olunan Mustafa Paşa-yı Atîk mahallesi sükkânından olan Haron v. Avram nâm Yahudi ile mahmiye-i mezbûre hısnı ebvâbından Samatyakapısı dâhilinde Arabkapısı kurbunda Hacı Hüseyin mahallesi sükkânından olan Foti v. Yorgi nâm zimmî vekîl-i merkūm Mustafa Çelebi mahzarında ikrâr ve takrîr-i kelâm edip biz dahi asl-ı deyn-i mezbûr bin iki yüz kıt‘a esedî guruşa emr ve kabûlü hâviye kefâlet-i sahîha-i şer‘iyye ile kefîl olduk dediklerinde mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Cemâziyelevvel li sene 1077. Şuhûdü’l-hâl: Odabaşı Mehmed Çelebi b. ( ) 49. [bölü]k, Sefer Beşe b. ( ) er-Râcil 55. [bölü]k, Şükrullah Bey b. Mustafa, Abdi b. Hüseyin, İbrahim b. Ahmed.