Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 441 Hüküm no: 593 Orijinal metin no: [97b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta v. Yanaki’nin ev ve bağ hissesini Todori v. Lika’ya satıp tarlasının da tasarruf hakkını devretmesi Vilâyet-i Rumeli’nde Mora sancağında Kalavrita kazâsına tâbi‘ İstrazeva nâm karye sâkinlerinden Kosta v. Yanaki meclis-i şer‘de işbu hâmilü’l-kitâb Todori v. Lika mahzarında ikrâr ve takrîr-i kelâm edip karye-i mezbûrede vâki‘ bir tarafdan Andriye v. Vilan mülküne ve bir tarafdan Yorgi v. Mitre? mülküne ve iki tarafdan tarîk-i âma müntehî bir tahtânî beyti ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilden yine karye-i mezbûre bağları dâhilinde vâki‘ lede’l-ahâlî ma‘lûmü’l-hudûd tahmînen altı dönüm üç kıt‘a mülk bağdan nısf hisse-i şâyi‘alarımı, cümle-i tevâbi‘i ile bi safkatin vâhidetin mezbûr Todori’ye bin üç yüz nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûrâtı mahallinde kabza müşterî-i merkūmu taslît eylediğimden sonra yine karye-i merkūme kurbunda mevâzi‘-i adîdede vâki‘ her biri inde’l-ahâliyi’d-diyâr ma‘lûmü’l-hudûd ve’l-mikdâr tahmînen on dönüm yedi kıt‘a tarlanın hakk-ı tasarrufların sâhib-i arz ma‘rifetiyle mezbûr Todori’ye tefvîz edip ol dahi minvâl-i muharrer üzre tefevvüz ve kabûl ettikden sonra mukābele-i tefvîzde olan bin nakd-i mezbûrü’n-na‘t akçeyi merkūm Todori yedinden bi’t-tamâm ve’l-kemâl ahz ve kabz eyledim ba‘de’l-yevm sâlifü’z-zikr mebî‘lerin nısfı mezbûrundur ve mârrü’z-zikr tarlaların hakk-ı tasarrufu dahi merkūmundur sâir emsâli tasarrufu gibi keyfe mâ yeşâ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-mezbûr Todori vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-ışrîn mine’l-Muharremi’l-harâm sene selâsîn ve elf. Şuhûdü’l-hâl: Mehmed Beşe b. Abdullah er-Râcil, Mustafa Beşe b. Abdullah er-Râcil, Mustafa b. Mehmed, Kosta v. Alaca, Niko v. Dimo, Yorgi v. ( ) ve gayruhüm.