Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 442 Hüküm no: 594 Orijinal metin no: [97b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Petro v. Yani ile Nikola v. İstati’nin sulh olarak birbirlerinin zimmetlerini ibra etmeleri Mahmiye-i Kostantıniyye -humiyet ani’l-âfât ve’l-beliyye- mahallâtından Balat câmi‘i kurbunda Mustafa Paşa mahallesinde sâkin Petro v. Yani nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Nikola v. İstati nâm zimmî muvâcehesinde ikrâr ve takrîr-i kelâm edip medîne-i Ebâ Eyyûb-i Ensârî -râdiye anhu Rabbühü’l-Bârî’de merhûm Defterdâr Mahmud Efendi mahallesi kurbunda vâki‘ merhûm Pîr Mehmed Paşa evkāfı’ndan olup bir tarafdan Cafer Bey b. Abdullah bostanına ve bir tarafdan Dimitri v. Mihal bostanına ve iki tarafdan tarîk-i âma müntehî eşcâr-ı müsmireyi hâvî senede bin iki yüz akçe mukāta‘ası olan bir kıt‘a mülk bostana müte‘allik mezbûr Nikola ile beynimizde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî beynimizde muslihûn tavassut edip es-sulhu seyyidü’l-ahkâm fehvâsınca yedi yüz yirmi akçe üzre beni akd-i sulh inşâ ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr yedi yüz yirmi nakd-i fıddî râyic fi’l-vakt akçeyi merkūm Nikola yedinden bi’t-tamâm ve’l-kemâl ahz ve kabz eyleyip husûs-ı mezbûra müte‘allik da‘vâ ve nizâ‘dan mezbûr Nikola’nın zimmetini ibrâ-i âm ile ibrâ ve iskāt-ı tâm ile iskāt eyledim ba‘de’l-yevm husûs-ı mezbûra müte‘allik benden bi’z-zât veya bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûrun minvâl-i muharrer üzre cârî olan ikrâr ve takrîrini mezbûr Nikola bi’l-muvâcehe tasdîk edicek mâ hüve’l-vâki‘ ketb olundu. Hurrire fi’l-yevmi’s-sâbi‘ ve’l-ışrîn mine’l-Muharremi’l-harâm min şühûr sene selâsîn ve elf. Şuhûdü’l-hâl: Mehmed Bey b. Abdullah Kethüdâ, Ali b. Abdullah, Ahmed b. Abdullah, Kurd b. Abdullah, Ali b. Abdullah ve gayruhüm mine’l-hâzırîn.