Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 442 Hüküm no: 595 Orijinal metin no: [97b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlya v. Menahem’in evini Hrisovidi bt. Menahem’e satması Havâss-ı Aliyye kazâsı tevâbi‘inden Hasköy mahallâtından Yenimahalle sâkinlerinden İlya v. Menahem nâm yahudi meclis-i şer‘-i mutahharda, işbu bâ‘isetü hâze’l-kitâb Hrisovidi bt. Menahem nâm nasrâniye mahzarında bi’t-tav‘ ve’r-rızâ ikrâr ve takrîr-i kelâm edip mahalle-i merkūmede vâki‘ bir tarafdan İlya v. Ormito mülküne ve bir tarafdan Yasef v. Cozef mülküne ve iki tarafdan tarîk-i âma müntehî üç fevkānî ve bir tahtânî beyti ve matbahı ve mahzeni ve bi’r-i mâyı ve kenîfi ve zât-ı eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile mezbûre Hrisovidi’ye yirmi bin fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen ve teslîm-i mebî‘-i mahdûd eyledim ba‘de’l-yevm sâlifü’z-zikr menzil-i mahdûd merkūme Hrisovidi’nin mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrin el-mukarru lehü’l-mezbûre Hrisovidi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Hurrire fi’l-yevmi’t-tâsi‘ ve’l-ışrîn mine’l-Muharremi’l-harâm li sene selâsîn ve elf. Şuhûdü’l-hâl: Fahrü’l-akrân Ahmed Ağa b. Abdullah el-Cündî Musli Çelebi b. ( ) el-Cündî Mahmud Çelebi b. Abdullah es-Saraç, Ahmed Bey b. Mehmed el-Cündî Mustafa b. Mehmed, Celini v. İsak, Yasef v. Marol, Zehriya v. Mosi, Yahuda v. Kurd ve gayruhüm. [98a] Nısfı Helvacızâde Efendi hazretlerinin ve nısfı Ahîzâde Mahmud Efendi b. Abdülhalim Efendi’nindir. Yoklanmışdır. Yâ Kebikeç. Yevmü’s-Selâse fî 21 min Zilhicceti’ş-şerîfe li sene tis‘a ve ışrîn ve elf.