Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 443 Hüküm no: 596 Orijinal metin no: [98b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsteryano v. Todori’nin bağını Yani v. Dimitri’ye satması Vilâyet-i Rumeli’nde İnebahtı sancağında Kûhistan nâhiyesine tâbi‘ Büyük Kerasova nâm karye sâkinlerinden İsteryano v. Todori nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yani v. Dimitri nâm zimmî mahzarında bi’t-tav‘ ve’r-rızâ ikrâr ve takrîr-i kelâm edip karye-i merkūmede vâki‘ bir tarafdan Yani v. Rado bağına ve iki tarafdan yine benim mülküme ve bir tarafdan tarîk-i âma müntehî ve mahdûd bir bâb şırahâneyi ve samanlığı müştemil tahmînen yirmi çapalık bir kıt‘a mülk bağımı cümle-i tevâbi‘ ve levâhıkı ile merkūm Yani’ye on bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bir kıt‘a bağ merkūm Yani’nin mülk-i müşterâ-yı sarîhidir keyfe mâ yeşâ ve yahtâr mutasarrıf olsun dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Yani bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire li târihi’l-mezbûr. Şuhûdü’l-hâl: Ali b. Abdullah el-Muhzır, Mustafa b. Mehmed el-Muhzır, Perviz b. Abdullah el-Muhzır, Anastaş v. Mihal, Şilo v. Vino, Yorgi v. Mihal, Şilo v. Mihal, Yorgi v. Mihal, Şilo v. Vino, Dimitri v. İsteryano, Yani v. İstemad, Dimitri v. Yorgi, İsteryanos v. Resalo, Anastaş v. Yorgi ve gayruhüm.