Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 444 Hüküm no: 597 Orijinal metin no: [98b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Panko’nun bağ hissesini kardeşi Kirko’ya satması Vilâyet-i Rumeli’nde Avlonya sancağında Ergirikasrı kazâsına tâbi‘ Katovorancı nâm karye sâkinlerinden Yani v. Panko nâm zimmî meclis-i şer‘-i şerîfde işbu hâmilü’l-kitâb li ebeveyn karındaşı Kirko nâm zimmî mahzarında bi’t-tav‘ ve’r-rızâ ikrâr edip karye-i merkūme bağları dâhilinde vâki‘ bir tarafdan Panko v. Kondi mülküne ve bir tarafdan müşterî-i mezbûr mülküne ve bir tarafdan Kini v. Vilaho mülküne ve bir tarafdan tarîk-i âma müntehî ve mahdûd karındaşım mezbûr Kirko ile ale’l-iştirâki’s-seviy mutasarrıf olduğumuz bir kıt‘a mülk bağdan nısf hisse-i şâyi‘amı cümle-i tevâbi‘iyle karındaşım mezbûr Kirko’ya bin nakid akçeye bâtten bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim ba‘de’l-yevm sâlifü’l-beyân bağdan nısf hisse-i şâyi‘am merkūm Kirko’nun mülk-i müşterâsıdır dedikde mukırr-ı mezbûrun minvâl-i muharrer üzre cârî olan ikrâr ve takrîrini el-mukarru lehü’l-mezbûr Kirko bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire li târihi’l-mezbûr. Şuhûdü’l-hâl: Mustafa b. Mehmed, Perviz b. Abdullah, Yakub b. Kurd, Panko v. Hristo, Panko v. Kondi, Yani v. Dimo, Kiro v. Niko, Duka [v.] Yorgo, Yani v. Vilikoni ve gayruhüm mine’l-hâzırîn.