Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 444 Hüküm no: 598 Orijinal metin no: [98b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Beşe b. Abdullah’ın evini Mehmed Beşe b. Berkadem’e satması Hadâik-i sultâniyyede Tersâne bahçesi bostancılarından fahrü’l-eşbâh İbrahim Beşe b. Abdullah meclis-i şer‘-i şerîfde işbu bâ‘isü’l-kitâb Mehmed Beşe b. Berkadem nâm acemi oğlanı mahzarında bi’t-tav‘ ve’r-rızâ ikrâr ve takrîr-i kelâm edip medîne-i Ebâ Eyyûb-i Ensârî -râdiye anhu Rabbühü’l-Bârî- tevâbi‘inden Hasköy’de el-Hâc Şaban mahallesinde vâki‘ bir tarafdan Rıdvan b. Abdullah mülküne ve bir tarafdan Şaban Hâtun bt. ( ) mülküne ve bir tarafdan Ahmed Ağa b. ( ) mülküne ve bir tarafdan Ali b. Abdullah mülküne müntehî bir tahtânî beyti ve bi’r-i mâyı ve eşcâr-ı müsmireyi hâvî cüneyneyi ve muhavvatayı müştemil mülk menzilimi cümle-i tevâbi‘i ile merkūm Mehmed Beşe’ye yedi yüz nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ kıldım ba‘de’l-yevm menzil-i mahdûd-ı mezkûr mezbûr Mehmed Beşe’nin mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm Mehmed Beşe vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâmin aşer min Zilhicceti’ş-şerîfe sene tis‘a ve ışrîn ve elf. Şuhûdü’l-hâl: Ali Halîfe, Mustafa b. Mehmed, Perviz b. Abdullah, Yakub [b.] Kurd.