Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 446 Hüküm no: 600 Orijinal metin no: [99a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dolo v. Yani’nin tarla tasarruf hakkını Yani ve Mano’ya satması [Vilâ]yet-i Rumeli’nde Yanya sancağında Kıratova kazâsına tâbi‘ Velah nâm karye sâkinlerinden Dolo v. Yani nâm zimmî meclis-i şer‘-i mutahharda, işbu hâmilân-ı hâze’l-kitâb Pavloki ve Mano v. Yako nâm zimmîler mahzarlarında ikrâr ve takrîr-i kelâm edip karye-i mezbûre sınırında Piralotor [nâm] mevzi‘de vâki‘ bir tarafdan Niko v. Todori tarlasına ve bir tarafdan Minho v. Yani tarlasına ve bir tarafdan kiliseye ve bir tarafdan Yako v. Papa tarlasına müntehî tahmînen yedi dönüm [bir] kıt‘a tarlanın hakk-ı tasarrufunu sâhib-i arz ma‘rifetiyle mezbûrâna tefvîz edip anlar dahi tefevvüz ve kabûl eylediklerinde mukābele-i tefvîzde altı bin nakd-i fıddî-i Osmânî râyic fi’l-vakt akçeyi merkūmân Yani ve Mano yedlerinden ale’l-iştirâki’s-seviy bi’t-tamâm ve’l-kemâl ahz ve kabz eyledim ba‘de’l-yevm sâlifü’l-beyân bir kıt‘a tarla mersûmundur sâir emsâli tasarrufu gibi mutasarrıf olsunlar dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehümü’l-mezbûrân vicâhen tasdîk ettiklerinde mâ hüve’l-vâki‘ bi’t-taleb ketb olundu. Hurrire fî 19 min Zilhicce li sene tis‘a ve ışrîn ve elf. Şuhûdü’l-hâl: Yani v. Minho, Dimo v. İstati, Mano v. İstati, Hano v. İstemad.