Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 202 Hüküm no: 182 Orijinal metin no: [24a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Kiryaki’nin üç yıllığına kiraladığı vakıf çörekçi dükkânına Receb Beşe’nin müdahaleden men‘i Çörekçi tâifesinden Dimitri v. Kiryaki nâm zimmî meclis-i şer‘-i hatîr-i lâzımü’t-tevkīrde Receb Beşe b. Mehmed nâm kimesne mahzarında üzerine da‘vâ ve takrîr-i kelâm edip Mahmiye-i İstanbul’da Edirnekapısı kurbunda vâki‘ merhûm Canbaz Mustafa Ağa vakfı’ndan olup icâreteyn-i ma‘lûmeteyn ile merkūm Receb Beşe’nin tasarrufunda olan nısf çörekçi dükkânını târih-i kitâbdan yirmi dört gün mukaddem yevmî sekizer akçe icâre ile üç sene tamâmına değin bana îcâr ve teslîm ben dahi istîcâr ve tesellüm edip minvâl-i muharrer üzre hat ve hatmini hâvî yedime tezkire vermiş iken hâlâ mezbûr Receb Beşe zikr olunan dükkân bana lâzım oldu deyû beni ihrâc etmek murâd eder suâl olunup bî-vech mu‘ârazadan men‘ olunması matlûbumdur dedikde gıbbe’s-suâl mezbûr Receb Beşe kaziyye bâlâda tafsîli mürûr ettiği vech üzre zikr olunan dükkânı üç sene tamâmına değin merkūm Dimitri’ye îcâr ve teslîm ettiğini bi tav‘ihî ikrâr ve i‘tirâf etmeğin mûcebince müdde‘î-i mezbûr Receb Beşe bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cemâziyelevvel li sene 1077. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, Baba Resul b. Rıdvan, Mehmed Beşe b. Ramazan.