Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 450 Hüküm no: 608 Orijinal metin no: [100a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia Hâtun bt. Ali’nin evini Fâtıma bt. Mahmud’a satması Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Süleyman Çelebi mahallesi sâkinelerinden Râbia Hâtun bt. Ali nâm bikr meclis-i şer‘de işbu bâ‘isetü’l-kitâb Fâtıma bt. Mahmud nâm hâtun mahzarında bi’t-tav‘ ve’r-rızâ ikrâr ve takrîr-i kelâm edip mahalle-i merkūmede vâki‘ bir tarafdan Derviş Mahmud b. Mustafa mülküne ve bir tarafdan hayyât Sefer b. Mehmed mülküne ve bir tarafdan çâşnigir Bâli mülküne ve bir tarafdan İbrahim b. Hasan mülküne müntehî ve mahdûd iki fevkānî ve iki tahtânî beyti ve sofayı ve iki kıt‘a cüneyneyi müştemil mülk menzilimi cümle-i tevâbi‘ ve levâhıkı ile mezbûre Fâtıma Hâtun’a on iki bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm sâlifü’l-beyân menzil-i mahdûd merkūme Fâtıma Hâtun’un mülk-i müşterâ-yı sarîhidir keyfe mâ yeşâ ve haysü mâ yürîd mutasarrıfe olsun dedikde mukırra-i mezbûrenin minvâl-i meşrûh üzre cârî olan ikrâr ve takrîrin el-mukarru lehü’l-mezbûre Fâtıma vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Hurrire fî 20 min Zilhicce li sene tis‘a ve ışrîn ve elf. Şuhûdü’l-hâl: Sunullah Efendi b. Hüsam el-İmâm, Sinan Efendi b. Alâaddin el-Kadı, Receb Dede b. Nurullah.