Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 456 Hüküm no: 616 Orijinal metin no: [101a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hâtun bt. İbrahim’in evini Ramazan b. Ali’ye satması Medîne-i Ebâ Eyyûb-i Ensârî mahallâtından Takyecibaşı mahallesi sâkinelerinden Emine Hâtun bt. İbrahim meclis-i şer‘-i mutahharda, işbu hâmilü’l-kitâb Ramazan b. Ali mahzarında bi’t-tav‘ ve’r-rızâ ikrâr ve takrîr-i kelâm edip mahalle-i mezbûrede vâki‘ bir tarafdan Dilsiz Hâtun bt. ( ) mülküne ve bir tarafdan bâyi‘a-i mezbûre vakfına ve bir tarafdan Takyecibaşı vakfı’na ve bir tarafdan tarîk-i âma müntehî ve mahdûd bir tahtânî beyti ve sofayı ve eşcâr-ı müsmire ve gayr-ı müsmireyi hâvî cüneyneyi müştemil mülk menzilimi cümle-i tevâbi‘ ve levâhıkı ile merkūm Ramazan’a beş bin nakd-i fıddî-i Osmânî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen ve teslîm-i mebî‘-i mahdûd eyledim ba‘de’l-yevm sâlifü’z-zikr menzil-i mezbûr merkūm Ramazan’ın mülk-i müşterâ-yı sarîhidir keyfe mâ yeşâ ve haysü mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takrîrin el-mukarru lehü’l-merkūm Ramazan vicâhen tasdîk edicek mâ vaka‘a bi’t-taleb ketb olundu. Hurrire fi’l-yevmi’r-râbi‘ min Muharremi’l-harâm sene selâsîn ve elf. Şuhûdü’l-hâl: Hüsam Efendi b. Abdurrahman, İbrahim Bey b. Mehmed?, Ramazan b. Durmuş, Pîr Ali b. Yusuf, el-Hâc Kalender b. Süleyman, Mehmed b. Abdullah, Mustafa b. Mehmed, Ali b. Abdullah, Mustafa b. Abdullah ve gayruhüm mine’l-hâzırîn.