Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 456 Hüküm no: 617 Orijinal metin no: [101b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Yusuf’un amcası kızı Âti Hâtun bt. Hasan’ı vasî tayin etmesi Medîne-i Ebâ Eyyûb-i Ensârî -râdiye anhu Rabbühü’l-Bârî- mahallâtından Takyecibaşı mahallesi sâkinelerinden fahrü’l-muhadderât Fâtıma Hâtun bt. Yusuf mahfil-i kazâda li ebeveyn ammisi kızı işbu bâ‘isetü’l-kitâb li ebeveyn ammisi kızı Âti Hâtun bt. Hasan mahzarında ikrâr ve takrîr-i kelâm edip vesâyâ-yı âtiyeyi tenfîze mezbûre Âti Hâtun’u vasiyy-i muhtâr eyledim şöyle ki ecel-i mevcûd [mev‘ûd] erişip irâdet-i Rabbânî ile âlem-i fânîden rıhlet eylediğimde bundan akdem mu‘takım olan Abdülkerim nâm şâbba malımdan ifrâz edip teslîm eylediğim iki bin nakd-i fıddî râyic fi’l-vakt akçe ve iki yorgan ve bir döşek ve bir minder verile ve mu‘takalarımdan dahi Gülendam bt. Abdullah nâm mu‘takama beş yüz nakid akçe ile bir yeşil kürk kaplı çukamı ve Sehergâh bt. Abdullah nâm mu‘takama dahi beynimizde ilm-i şer‘î birle ma‘lûm ikişer kat esbâb ve bir mâî kadife kaftan ve bir âl hâre kaftan ve bir raht kuşağımı ve Mülâyim bt. Abdullah nâm mu‘takamın sadrî oğulları Hüseyin ve Ahmed’e dahi malımdan ifrâz edip beşer yüz akçe verdikden sonra âmme-i muhallefâtımı vasiyy-i muhtârım mesfûre Âti Hâtun zabt ve tasarruf edip âmme-i muhallefâtımın sülüsünden altı bin akçeyi intikāl ettiğim günde techîz ve tekfînim ve tilâvet-i hatm-i şerîf ve tilâvet-i eczâ’-i şerîfeme ve telkīne ve tesbîh ve iskāt ve salâtıma üçümde ve [yedimde] ve kırkımda ve yılımda tabh-ı ta‘âm ve sâir vücûh-ı hayrâta harc ve sarf eyleye dedikde mezbûre Âti Hâtun dahi vesâyet-i mezbûreyi kabûl ve hizmet-i lâzımesini edâ ve kıyâma müte‘ahhid olmağın mâ hüve’l-vâki‘ bi’t-taleb ketb olundu. Hurrire fi’t-târihi’l-[mezbûr]. Şuhûdü’l-hâl: Fazlullah Efendi el-Kadı, Mehmed Efendi b. Maden el-İmâm, Abdülaziz Çelebi b. Hüsam, Mehmed Bey b. Cafer el-Cündî Mehmed Bey b. Şaban el-Bevvâb ve gayruhüm.