Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 457 Hüküm no: 618 Orijinal metin no: [101b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Yusuf b. Abdünnebi’nin mütevellisi olduğu Şaban Efendi Evkâfına ait evi tamir ettirmesi Medîne-i Ebâ Eyyûb el-Ensârî -râdiye anhu Rabbühü’l-Bârî- mahallâtından Defterdâr Süleyman Çelebi mahallesinde vâki‘ merhûm Şaban Efendi evkāfı’na bi’l-fi‘l mütevellî olan el-Hâc Yusuf b. Abdünnebi meclis-i şer‘-i hatîr-i lâzımü’t-tevkīrde takrîr-i kelâm edip mahalle-i mezbûrede vâki‘ iki tarafdan hâlâ cebeciler çavuşu olan fahrü’l-akrân Mehmed Çavuş b. ( ) mülküne ve bir tarafdan vakf-ı mezbûra ve bir tarafdan tarîk-i âma müntehî olan bir fevkānî beyti ve kileri ve kenîfi muhtevî olan vakıf menzil harâbe müşrif olup kābil-i süknâ olmamağla ta‘mîr ve termîme muhtâc olmağın menzil-i mezbûrun câ-be-câ harâb olup meremmâtına lâzım olan mevâzi‘ için direklerine ve tabanlarına ve tahtalarına ve pedavrasına ve kiremidlerine ve üstâdiyye ve ırgadiyye ve hammâliyyesine yedimde olan müfredât defteri mûcebince cem‘an iki bin beş yüz seksen dokuz akçe harc ve sarf eyledim hâlâ kıbel-i şer‘den üzerine varılıp sarf eylediğim esmân tahmîn ile dahi tahmîn ve tahammülü tahrîr olunması matlûbumdur dedikde cânib-i şer‘-i kavîmden mevlânâ Hidâyetullah Efendi ve hâssa mi‘mârlardan Musli Çelebi b. Hüsam irsâl olunup anlar dahi zeyl-i kitâbda mastûrü’l-esâmî olan bî-garaz müslimîn ile üzerine varıp müşâhede eylediklerinde fi’l-hakīka menzil-i mezbûrun direklerine ve tabanlarına ve tahtalarına ve pedavrasına ve kiremidlerine ve üstâdiyye ve hammâliyyesine yedinde olan müfredât defteri mûcebince ferden ferdâ hesâb olundukda iki bin beş yüz seksen dokuz akçe olup meblağ-ı mezbûrdan noksânla olmaz deyû müşârün-ileyh Musli Çelebi ve sâir ehl-i vukūfun icmâ‘ ve ittifâklarını mevlânâ-yı mûmâ-ileyh mahallinde tahrîr ve ba‘dehû meclis-i şer‘de alâ vukū‘ihî ihbâr etmeğin mâ hüve’l-vâki‘ ketb olundu. Hurrire fî târihi’l-mezbûr. Şuhûdü’l-hâl: El-Hâc Receb b. Yunus, Ahmed Çelebi b. İbrahim el-Kassâm, Veli b. Abdünnebi, Hüsam Efendi b. Ahmed el-Müderris, Yakub b. Kurd.