Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 458 Hüküm no: 619 Orijinal metin no: [101b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muhibbe Ayşe Hâtun Evkâfı’na borçlu olan Angeli v. Yanaki’ye David v. Yasef ile karısı İrine bt. Todori’nin kefîl olması [Derkenar:] 50.000 Mahmiye-i Kostantıniyye -humiyet ani’l-âfât ve’l-beliyye- mahallâtından Balat câmi‘i kurbunda Tahtaminâre mahallesi sâkinlerinden Angeli v. Yanaki nâm zimmî mahfil-i kazâda Medîne-i Ebâ Eyyûb-i Ensârî -râdiye anhu Rabbühü’l-Bârî-’de vâki‘ merhûme Muhibbe Ayşe Hâtun evkāfı’na bi’l-fi‘l mütevellî olan fahrü’l-a‘yân Mehmed Çavuş b. Mustafa mahzarında ikrâr ve takrîr-i kelâm edip mâl-ı vakf-ı mezbûrdan asl-ı mâl kırk bin akçe ve iki senede hâsıl olan murâbahadan on bin akçe ki cem‘an elli bin nakd-i fıddî-i Osmânî râyic fi’l-vakt akçe hâlâ zimmetimde lâzımü’l-edâ ve vâcibü’l-kazâ deynimdir dedikde mukırr-ı mezbûru ikrâr-ı meşrûhunda mütevellî-i merkūm bi’l-muvâcehe tasdîk ettikden sonra mahmiye-i mezbûre mahallâtından merhûm İbrahim Çavuş mahallesinde sâkin Kalori cemâ‘atinden David v. Yasef nâm yahudi ve medyûn-ı merkūm Angeli’nin zevcesi İrine bt. Todori nâm nasrâniye küllü vâhidin meblağ-ı mersûma emr ve kabûlü hâvî kefâlet ile kefîl bi’l-mâl olup mütevellî-i mezbûr dahi minvâl-i muharrer üzre kefâletlerini kabûl ettikden sonra târih-i kitâbdan yüz gün tamâmına değin meblağ-ı mezbûr elli bin akçeyi mütevellî-i mezbûr Mehmed Çavuş’a cânib-i vakf-ı mezbûr için bi’t-tamâm ve’l-kemâl edâ ve îfâ edemezsem mütevellî-i mersûmun yedinde rehn-i makbûzum olan bir çift la‘l küpe ve seksen sekiz miskāl bir çift altın bilezik ve bir murassa‘ altın istikan ve bir murassa‘ sorguç ve sâir beynimizde ilm-i şer‘î ile ma‘lûm cevâhirlerimi bey‘ ve kabz-ı semen edip meblağ-ı mersûm elli bin akçeyi cânib-i vakf-ı mezbûra edâ ve îfâ ve fazlasına bana teslîme mütevellî-i mezbûr Mehmed Çavuş’u masûn ani’l-azl me’zûn bi’t-tasarruf vekâlet-i devrî ile vekîl ve menâbıma nâib nasb ve ta‘yîn eyledim dedikde ol dahi vech-i mübeyyen üzre vekâlet-i merkūmeyi kabûl ve hizmet-i lâzımesini edâya müte‘ahhid olıcak mâ hüve’l-vâki‘ gıbbe’t-taleb ketb olundu. Hurrire fî 25 min Zilhicce[ti’ş-şerîfe] li sene tis‘a ve ışrîn ve elf. Şuhûdü’l-hâl: Bayram Efendi b. Şükrullah el-Hatîb, Hasan Efendi b. Abdi el-İmâm, Turgud Halîfe b. Durak, Sunullah Efendi b. Siyâmi el-İmâm, İsa Halîfe b. Evhad el-Kayyım, Mehmed b. Mehmed el-Kayyım, Perviz b. Abdullah, Mehmed Çelebi b. Mustafa, Mustafa b. Mehmed, Mahmud b. Ali, Yakub b. Kurd ve gayruhüm mine’l-hâzırîn.