Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 459 Hüküm no: 620 Orijinal metin no: [101b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiro v. Sanço’nun tarla tasarruf haklarını Kini v. Dimo ile Dimo v. Diyo’ya satması Vilâyet-i Rumeli’nde Ergirikasrı kazâsına tâbi‘ Sarakiste nâm karye sâkinlerinden Kiro v. Sanço nâm zimmî meclis-i şer‘de hâmilü’l-kitâb Kini v. Dimo ve Dimo v. Diyo nâm zimmîler mahzarında ikrâr edip karye-i merkūme kurbunda vâki‘ her biri lede’l-ahâlî ma‘lûmü’l-hudûd mutasarrıf oldu[ğum] sekiz kıt‘a tarlanın hakk-ı tasarrufunu sâhib-i arz ma‘rifetiyle merkūmân Kini ve Dimo’ya ale’l-iştirâk tefvîz edip ol dahi minvâl-i muharrer üzre tefevvüz ve kabûl eylediklerinden sonra mukābele-i tefvîzde olan iki bin akçeyi merkūmân yedlerinden ale’l-iştirâk ahz ve kabz eyledim ba‘de’l-yevm sâlifü’l-beyân tarlaların hakk-ı tasarrufu merkūmânındır, keyfe mâ yeşâân mutasarrıf olsunlar dedikde mukırrân-ı mezbûr[ânın] minvâl-i muharrer üzre cârî olan ikrâr ve takrîrin el-mukarru lehümü’l-mezbûrân bi’l-muvâcehe tasdîk edicek ketb olundu. Hurrire fi’l-yevmi’s-sâdis mine’l-Muharremi’l-harâm li sene selâsîn ve elf. Şuhûdü’l-hâl: Minho v. İstati, Kirice v. Hristo, Cave v. Yani, Niko v. Danyal, Dimo v. Duka, Sago v. Yani, Yorgo v. Koçi, Yorgi v. Şano, Duka v. Minho, Birani v. Koşiron ve gayruhüm mine’l-hâzırîn.