Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 459 Hüküm no: 621 Orijinal metin no: [102a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiro v. Sanço’nun evi, bağı ve bostan yerini Kini v. Dimo ile Dimo v. Diyo’ya satması Yine bâyi‘-i mezbûr Kiro meclis-i şer‘de hâmilü’l-kitâb müşteriyyân-ı mezbûrân Kini ve Dimo nâm zimmîler mahzarlarında bi’t-tav‘ ikrâr edip karye-i merkūmede vâki‘ bir tarafdan müşterî-i mezbûr Kini mülküne ve bir tarafdan Yorgo v. Kondi mülküne ve bir tarafdan Salova v. Toma mülküne ve bir tarafdan ( ) müntehî bir tahtânî beyti ve zât-ı eşcâr-ı müsmire ve gayr-ı müsmireyi hâvî hadîkayı ve harman yerini müştemil olan mülk menzili ve yine karye-i merkūme kurbunda vâki‘ bir tarafdan Rado v. Dimo bağına ve bir tarafdan Duka v. Kazara bağına ve bir tarafdan ( ) bağına ve bir tarafdan tarîk-i âma müntehî bir kıt‘a mülk bağımı ve yine karye-i merkūme kurbunda vâki‘ bir tarafdan Yani v. Dirivo mülküne ve bir tarafdan Diriçi v. Yorgo mülküne ve bir tarafdan Salova v. Toma mülküne ve bir tarafdan tarîk-i âma müntehî zât-ı eşcâr-ı müsmireyi hâvî bir kıt‘a mülk bostan yerimi cümle-i tevâbi‘ ve levâhıkı ile merkūmân Kini ve Dimo’ya bi safkatin vâhidetin altı bin nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mebî‘ât-ı mezkûrâtı mahallinde kabza müşteriyyân-ı merkūmânı taslît eyledim ba‘de’l-yevm sâlifü’l-beyân mebî‘ler merkūmân Kini ve Dimo’nun mülk-i müşterâ-yı sarîhidir keyfe mâ yeşâân mutasarrıf olsunlar dedikde mukırrân-ı mezbûrânın minvâl-i muharrer üzre cârî olan ikrâr ve takrîrin el-mukarru lehümü’l-mezbûrân bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Şuhûdü’l-hâl: es-Sâbıkūn.