Eyüb Mahkemesi (Havass-ı Refia) 19 Numaralı Sicil (H. 1028 - 1030 / M. 1619 - 1620) cilt: 24, sayfa: 460 Hüküm no: 623 Orijinal metin no: [102a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haydar Beşe b. Abdullah’ın ortaklarına borcunu ödemesi Medîne-i Ebâ Eyyûb-i Ensârî -râdiye anhu Rabbühü’l-Bârî- kasablarından Ali b. Abdullah ve Kurd b. Abdullah nâm kimesneler ve Todori v. Mihal nâm zimmî meclis-i şer‘-i hatîr-i lâzımü’t-tevkīrde Haydar Beşe b. Abdullah nâm râcili ihzâr ve mahzarında her biri takrîr-i da‘vâ edip mezbûr Haydar Beşe ile kasablık san‘atında şerîkler olup sermâyemiz olan meblağdan ziyân ettiğimizde târih-i kitâbdan dört ay mukaddem Kasımpaşa’da beynimizde hesâb edip ba‘de külli hesâb merkūm Haydar Beşe zimmetinde yirmi dokuz bin fıddî râyic fi’l-vakt akçe zuhûr edip edâsına mukır ve mu‘terif olmuşidi hâlâ vermede ta‘allül eder bi hasebi’ş-şer‘i’ş-şerîf suâl olunup tahlîs olunması matlûbumuzdur dediklerinde gıbbe’s-suâl akībe’l-inkâr, müdde‘iyyûn-ı mezbûrûndan sıdk-ı makāllerine mutâbık beyyine taleb olundukda udûl-i müslimînden İbrahim Çelebi b. Mustafa ve Mahmud b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olundukda fi’l-vâki‘ mevzi‘-i merkūmda târih-i mezkûrda mezbûrûn bizim huzûrumuzda hesâb edip ba‘de külli hesâb merkūm Haydar Beşe zimmetinde yirmi dokuz bin akçe zuhûr edip edâsına mukır ve mu‘terif olduğuna şâhidleriz şehâdet dahi ederiz deyû edâ-i şehâdet-i şer‘iyye ettiklerinde şehâdetleri ba‘de’t-ta‘dîl hayyiz-i kabûlde vâkı‘a oldukdan sonra mûcebiyle meblağ-ı mezbûrun edâsına merkūm Haydar Beşe’ye tenbîh birle mâ hüve’l-vâki‘ bi’t-taleb ketb olundu. Hurrire fî 29 min Muharremi’l-harâm li sene selâsîn ve elf. Şuhûdü’l-hâl: Ahmed Halîfe b. ( ) el-Bevvâbü’s-sultânî, Hasan Beşe b. İbrahim el-Mübâşir, Mustafa b. Abdülbâkī, Ali b. Abdullah, Perviz b. Abdullah, Yakub b. Kurd ve gayruhüm.