Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 63 Hüküm no: 10 Orijinal metin no: [1(2)b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer Kethüda b. Kurd’un ev ve tarlalarını Mehmed Çavuş b. Murad Çavuş’a sattığı Havâss-ı Aliyye kazâsı müzâfâtından Ayapa nâm karye sâkinlerinden Cafer Kethüdâ b. Kurd nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Mehmed Çavuş b. Murad Çavuş mahzarında ikrâr ve i‘tirâf edip işbu akdin sudûruna değin silk-i mülkümde olan emlâkimden Havâss-ı mezbûre tevâbi‘inden Küçük Halkalı nâm karyede vâki‘ bir tarafdan Mustafa mülkü ve bir tarafdan Ebûbekir Beşe ve bir tarafdan Halil Beşe ve bir tarafdan tarîk-i âm ile mahdûd iki bâb fevkānî beyti ve altında ahırı ve iki tahtânîsi ve bir ahırı ve bir samanlık ve bir fırını ve bi’r-i mâyı ve muhavvata-i zât-ı eşcâr-ı müsmire ve gayr-ı müsmireyi müştemil çiftlik ta‘bîr olunur mülk menzilimi ve menzil-i mezbûr dâhilinde bir fıçı iki tahta sandık ve kırk sekiz keyl buğday ve altmış keyl alef ve tahmînen on çit saman ve beynimizde ma‘lûm bir çift kara sığır öküzü ve sâir âlât-ı zirâ‘at ve esbâb-ı hırâseti mezbûr Mehmed Çavuş’a fıddî nakd-i râyic fi’l-vakt kırk bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ edip ol dahi vech-i meşrûh üzre iştirâ ve kabûl eyledikden sonra karye-i mezbûre hudûdu dâhilinde zikr olunan çiftlik ile tasarruf eylediğim mevâzi‘-i adîdede vâki‘ lede’l-ahâlî ma‘lûmü’l-hudûd tahmînen on müd tohum istî‘âb eder yirmi dört kıt‘a tarlalarımın dahi hakk-ı tasarrufunu, sâhib-i arz ma‘rifetiyle mezbûr Mehmed Çavuş’a on bin akçe mukābelesinde tefvîz edip ol dahi tefevvuz ve kabûl eyledikden sonra semeni mezbûr kırk bin akçe ile bedel-i tefvîz olan on bin akçe ki cem‘an altı bin akçeyi mezbûr Mehmed Çavuş yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan emlâk ve eşyâ-i mezbûr Mehmed Çavuş’un mülk-i müşterâsı ve tarlalar dâhil-i taht-ı tasarrufu olmuşdur dedikde gıbbe’t-tasdîki’ş-şer‘î mâ vaka‘a ketb olundu. Fi’l-yevmi’s-sâbi‘ min Cemâziyelevvel li sene seb‘a ve erba‘în ve elf. Şuhûdü’l-hâl: Mustafa Efendi el-İmâm, Ali Ağa b. Abdullah, Abdurrahman Efendi el-Kadı, Mehmed Bey b. İlyas Beşe, Bekir Beşe b. Abdullah, Mehmed b. Mustafa, diğer Bekir Beşe, Mustafa b. Veli.