Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 64 Hüküm no: 12 Orijinal metin no: [1(2)b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Mehmed’in bahçesini Mehmed Paşa’ya sattığı Havâss-ı Refî‘a kazâsı müzâfâtından Terkos nâhiyesine tâbi‘ Birinci karyesinde sâkin olan Mustafa Çelebi b. Mehmed mahfil-i kazâda sâhib-i hâze’l-kitâb sâbıkan Kefe beylerbeyisi olan emîrü’l-ümerâ’i’l-kirâm kebîrü’l-küberâ’i’l-fihâm Mehmed Paşa hazretlerinin taraf-ı refî‘lerinden ikrâr-ı âti’z-zikri tasdîka vekîl olup hasm-ı câhid mahzarında nehc-i şer‘î üzre vekâleti sâbite olan Çâker Bey b. Abdullah mahzarında ikrâr-ı tâm ve takrîr-i kelâm edip babam müteveffâ-yı merkūm Mehmed’den intikāl edip karye-i merkūmede vâki‘ bir tarafı dere ve bir tarafı tarîk-i âm ve iki tarafı kendi mülk bahçem ile sınır üzerinde vâki‘ olan büyük meşe ağacı ile mahdûd olup eşcâr-ı müsmire-i mütenevvi‘ayı müştemil olan bir kıt‘a mülk bahçemi mûmâ-ileyh Mehmed Paşa hazretlerine tarafeynden îcâb ve kabûlü hâvî bey‘-i bâtt-ı sahîh-i şer‘i ile beş bin nakd-i râyic fi’l-vakt fıddî akçeye bey‘ ve teslîm edip onlar dahi vech-i muharrer üzre iştirâ ve tesellüm eyledikden sonra semeni olan meblağ-ı merkūm beş bin akçeyi yedlerinden bi’t-tamâm ve’l-kemâl ahz ve kabz eyledim ba‘de’l-yevm mülk-i müşterâlarıdır, keyfe mâ yeşâ’ ve yahtâr mutasarrıf olsun dedikde vekîl-i mezbûr Çâker Bey vicâhen ve şifâhen tasdîk ve tahkīk edicek mâ hüve’l-vâki‘ gıbbe’t-taleb ketb olundu. Fi’l-yevmi’s-sâmin min Cemâziyelevvel li sene seb‘a ve erba‘în ve elf. Şuhûdü’l-hâl: Mehmed Çavuş b. Abdullah, Uzun Mustafa b. Abdullah, Receb Efendi b. Abdi, Veli b. Abdullah, Ali b. Mustafa, Cafer b. Abdullah, Mahmud b. Ahmed, Mustafa b. Veli, Ali b. Mustafa ve gayruhüm.