Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 65 Hüküm no: 13 Orijinal metin no: [1(2)b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çavuş b. Davud Çavuş’un Cafer Kethüda b. Kurd’a borcu olması Mahmiye-i Kostantıniyye hısnı ebvâbından Topkapı dâhilinde Bayezid Ağa mahallesinde sâkin Mehmed Çavuş b. Davud Çavuş meclis-i şer‘-i hatîr-i lâzımü’t-tevkīrde işbu hâmilü’l-kitâb Cafer Kethüdâ b. Kurd mahzarında ikrâr ve i‘tirâf edip mezbûr Cafer Kethüdâ’ya çiftlik bahâsından hâlâ zimmetimde târih-i kitâbdan yüz elli gün tamânına değin müeccel nakd-i râyic fi’l-vakt on üç bin akçe lâzımü’l-edâ ve vâcibü’l-kazâ deynim vardır dedikde mukırr-ı mezbûr Mehmed Çavuş ikrâr-ı meşrûhunda el-mukarru lehü’l-merkūm Cafer Kethüdâ bi’l-muvâcehe tasdîk ve tahkīk edicek mâ hüve’l-vâki‘ gıbbe’t-taleb [ketb] olunup yed-i tâlibe def‘ olundu. Tahrîren fi’l-yevmi’s-sâbi‘ min Cemâziyelevvel li sene seb‘a ve erba‘în ve elf. Şuhûdü’l-hâl: Receb Efendi b. Abdi, Mehmed b. Mustafa, Abdülkerim b. Mehmed, Ali b. Mustafa, Mustafa b. Veli, Mustafa Efendi el-İmâm, Yakub b. Kurd, Cafer b. Abdullah.