Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 66 Hüküm no: 15 Orijinal metin no: [2a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Derviş’in evini oğlu Mehmed Çelebi b. Davud’a hibe ettiği Medîne-i Hazret-i Ebî Eyyûb el-Ensârî mahallâtından Fethi Çelebi mahallesinde sâkine Fâtıma bt. Derviş Mehmed nâm hâtun mahfil-i kazâda sadrî kebîr oğlu hâmilü’l-kitâb Mehmed Çelebi b. Davud mahzarında bi’t-tav‘ i‘tirâf edip mahalle-i mezbûrede vâki‘ bir tarafı Saray-ı atîk halkına mahsûs olan mezarlık ve bir tarafı Sirkeci Emir vakfı ve bir tarafı mi‘mâr Mustafa Çavuş mülkü ve bir tarafı tarîk-i âm ile mahdûd olup iki bâb tahtânî odaları ve sofa ve kenîfi ve bi’r-i mâyı ve muhavvata-i zât-ı eşcâr-ı müsmireyi müştemil olan mülk menzili, cümle tevâbi‘ ve levâhıkı ile oğlum mezbûr Mustafa Çelebi’ye şerâit-i sahîha mevâni‘-i rücû‘dan âriye hibe-i sahîha-i şer‘iyye ile hibe ve temlîk eyleyip ol dahi meclis-i hibede ittihâb ve kabûl ve kabz ve tesellüm eyledi ba‘de’l-yevm menzil-i mezbûr oğlum merkūm Mehmed Çelebi’nin mülk-i mevhûbudur, keyfe mâ yeşâ’ mutasarrıf olsun dedikde mukırra-i mezbûre Fâtıma Hâtun’u cemî‘ ikrâr-ı meşrûhunda oğlu merkūm Mehmed Çelebi vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’t-tâsi‘ min Cemâziyelevvel li sene seb‘a ve erba‘în ve elf. Şuhûdü’l-hâl: İbrahim Efendi b. Mustafa el-İmâm, Mahmud b. İbrahim el-Müezzin, Mehmed Beşe b. Abdi, Mehmed b. Osman, Ahmed b. Hasan, terekeci Hasan, Mustafa b. ( ), İsa b. ( ), Ali b. Mustafa, Mustafa Çelebi b. Veli, Mustafa Beşe Çukadâr.