Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 67 Hüküm no: 16 Orijinal metin no: [2a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Defterdar ve Balçık iskeleleri kantar resminin Âişe Hatun bt. Hüseyin’e verilmesi Medîne-i Hazret-i Ebî Eyyûb el-Ensârî mahallâtından Baba Haydar mahallesi sâkinelerinden işbu râfi‘atü’l-kitâb Âişe Hâtun bt. Hüseyin mahfil-i kazâda takrîr-i kelâm edip medîne-i mezbûrede vâki‘ Defterdâr ve Balçık iskelelerinde vezn olunan odun ve sâir metâ‘larının resm-i kantâriyyeleri ber mûceb-i defter-i hâkānî hazret-i müşârün-ileyhin vakfına hâsıl kayd olunmağla cânib-i vakıfdan babam müteveffâ-yı mezbûr Hüseyin ma‘rifet-i mütevellî ile senevî on akçe mukāta‘a ile mutasarrıf olup ba‘de vefâtihî izn-i mütevellî ile bu âna gelince ben mutasarrıf idim hâlâ hazret-i müşârün-ileyhin evkāf-ı şerîfelerinin akārât ve arâzisi tahrîr ve yerli yerlerinden teftîş ve tefahhus olunup ecr-i misli ve mukāta‘a-i mislinden noksân üzre olanlar îcâr olunmak bâbında emr-i âlî ve fetvâ-yı şerîfe vârid olup benim dahi temessükâtım zâyi‘ olmağın mezbûr Ahmed Ağa cânib-i vakıfdan zikr olunan iskelelerin rüsûm-ı kantâriyyesini sûk-ı sultâniyede mirâren ve kirâren nidâ ve müzâyede ettirip rağabât-ı nâs bi’l-külliye münkatı‘a oldukdan sonra üç bin akçe icâre-i mu‘accele ve beher sene yüz seksen akçe mukāta‘a takdîri ile benim üzerimde karâr edip ziyâde ile tâlib-i âhar zuhûr etmemeğin mütevellî-i merkūm Ahmed Ağa zikr olunan Defterdâr ve Balçık iskelelerinde vezn olunan odun ve sâir metâ‘ın rüsûm-ı kantâriyyesini vech-i meşrûh üzre bana îcâr edip yedime târih-i kitâb senesi Saferü’l-hayrı’nın evâhiri târihi ile müverrah imzâ ve hatmi müştemil temessük vermişdir, nazar olunup mûcebince hüccet-i şer‘iyye olunması matlûbumdur deyip mazmûnu takrîrine mutâbık ve târih-i merkūm ile müverrah mezbûr Ahmed Ağa’nın imzâ ve hatmini müştemil ibrâz etmeğin istihkâmen cânib-i şer‘den dahi bu hurûf ketb olunup yedine def‘ olundu. Tahrîren fi’l-yevmi’s-sâmin min Cemâziyelevvel li sene seb‘a ve erba‘în ve elf. Şuhûdü’l-hâl: İbrahim [b.] Nasuh, Safer b. Abdullah, Yakub b. Kurd, Mustafa Beşe Çukadâr, Mustafa b. Veli, Receb Efendi ve gayruhüm.