Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 67 Hüküm no: 17 Orijinal metin no: [2a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pertev Paşa’nın kızı Safiye Hanım’ın su yolu keşfi Pertev Paşa kızı Safiye Hanım Vefâ Meydanı’nda sarayına Umdetü’l-muhadderât zübdetü’l-muvakkarât tâcü’l-mestûrât iklîletü aliyyetü’z-zât safiyyetü’s-sıfât Safiye Hanım bt. el-merhûm el-mebrûr ed-dâricü ilâ medârici rahmeti Rabbihi’l-gafûr Pertev Paşa hazretlerinin taraf-ı karînü’ş-şereflerinden husûs-ı âti’l-beyâna vekîl olup müşârün-ileyhâ hazretlerini ma‘rifet-i şer‘iyye ile ârifeyn olan Saray-ı âmireleri serdârlarından Baltacı Bekir b. Mustafa ve Musa b. Abdullah şehâdetleri ile şer‘an vekâleti sâbite olan dergâh-ı âlî -dâme mahfûfen bi’l-me‘âlî- kapıcıbaşılarından kıdvetü’l-emâcid ve’l-ekârim müstecmi‘ü’l-mehâmid ve’l-mekârim zü’l-kadri’r-refî‘ ve’l-câhi’l-menî‘ müvekkile-i müşârün-ileyhânın zevci Mahmud Ağa b. el-merhûm el-mağfûrun-leh Hızır Paşa -refe‘ahu’llâhu derecâtihî fî a‘le’l-ılliyyîn ve etâ Rabbühû bi’l-hûri’l-‘în hazretleri meclis-i şer‘-i şerîf-i meşâyihü’l-imâd ve mahfil-i dîn-i münîf-i râsihü’l-evtâdda gelip takrîr-i kelâm ve ta‘bîr-i ani’l-merâm edip müvekkilem müşârün-ileyhâ Safiye Hanım’ın ebâ-an-ced yedlerine verilen tuğrâ-yı garrâ ile mücellâ mülknâme ile mutasarrıf [2b] olup mahmiye-i Kostantıniyye -hamâhallâhu te‘âlâ ani’l-beliyye- mahallâtından eş-Şeyh Ebülvefâ câmi‘-i şerîfi mahallesinde Vefâ Meydanı demekle ma‘rûf olan mahalde vâki‘ ve inde’l-vazî‘ ve’ş-şerîf ta‘rîf ve tavsîfden müstağnî olan saraylarında ile’l-ân cereyân eden bir kamış ve bir masura mâ’ın medîne-i Ebî Eyyûb el-Ensârî -radıyallâhu te‘âlâ- indinde Debbâğlar deresi demekle ma‘rûf mevzi‘de Kırkçeşme suyu mecrâsına ilhâk olunduğu mahalde hâlâ ne mikdâr idiği tahmîn-i sahîh ile tahmîn olunmak için savb-ı şer‘-i kavîmden âdem irsâl olunmak taleb etmeğin cânib-i şer‘-i şerîfden mevlânâ Mustafa Efendi irsâl olunup ol dahi bi’l-fi‘l mi‘mârbaşı olan kıdvetü’l-emâcid ve’l-a‘yân Kasım Ağa ve suyolu nâzırı olan fahrü’l-emâsil ve’l-akrân Hasan Ağa taraflarından husûs-ı mezbûr için irsâl eyledikleri el-Hâc İbrahim b. Sefer ve suyolcuları kethüdâsı olan üstâd Mehmed b. Mustafa ve suyolcularından Veli Bey b. Ramazan nâm kimesneler ile mahall-i mezbûra varıp tahmîn-i sahîh ile tahmîn eylediklerinde mâ-i mezbûr Kırkçeşme suyu mecrâsına ilhâk olunduğu mahalde hâlâ ancak bir masura su olduğuna icmâ‘ ve ittifâk eylediklerini mevlânâ-yı mezbûr mahallinde ketb ve tahrîr ba‘dehû gelip meclis-i şer‘de vukū‘u üzre ihbâr ve takrîr etmeğin mâ hüve’l-vâki‘ bi’t-taleb ketb olundu. Hurrire fî evâili Cemâziyelevvel li sene seb‘a ve erba‘în ve elf. Şuhûdü’l-hâl: Receb Efendi b. Abdi, Yakub b. Kurd, Hüseyin b. Abdullah, Mustafa b. Abdullah el-Bevvâb-ı sultânî, Ömer b. Ahmed, Mehmed b. Abdullah Cafer b. Abdullah.