Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 68 Hüküm no: 18 Orijinal metin no: [2b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Mehmed’in Yako ve Arslan adlı iki kardeşe borcu olduğu Mahmiye-i Kostantıniyye’de Kalenderhâne mahallesi sükkânından ve Merkepçibaşı oğlu demekle ma‘rûf Mustafa Çelebi b. Mehmed el-Cündî mahfil-i kazâda Yahud tâifesinden râfi‘ü’l-kitâb çukacı Yako v. Yako ve li üm karındaşı Arslan v. Murdehay nâm Yahudiler muvâcehelerinde bi’t-tav‘i’t-tâm ikrâr ve i‘tirâf edip mezbûrân Yako ve Arslan yedlerinden müşterek oldukları mâllarından iki bin beş yüz kâmil riyâlî guruş istikrâz ve kabz eyledim hâlâ meblağ-ı mezbûr iki bin beş yüz guruş mezbûrân Yako ve Arslan için zimmetimde vâcibü’l-edâ ve lâzımü’l-kazâ deynimdir dedikde mezbûr Mustafa Çelebi’nin minvâl-i meşrûh üzre cârî olan ikrârını merkūmân Yako ve Arslan bi’l-muvâcehe tasdîk eylediklerinden sonra mezbûrlar dahi meblağ-ı mezbûr iki bin beş yüz guruşu târih-i kitâbdan yüz gün tamâmına değin te’cîl etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâdî aşer min Cemâziyelevvel li sene seb‘a ve erba‘în ve elf. Şuhûdü’l-hâl: Hasan b. Abdullah, Receb Efendi b. Abdi, Yakub b. Kurt, Ali Beşe b. Mustafa, Mustafa b. Mahmud, Cafer b. Abdullah ve gayruhüm.