Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 70 Hüküm no: 21 Orijinal metin no: [2b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nazar v. Murat’ın babasının mirasından hakkını aldığı Ermeni tâifesinden Nazar v. Murat nâm emred meclis-i şer‘-i şerîfde ceddi Murat v. Serkis nâm Ermeniler ve ceddesi Bebeki bt. Serkis nâm Ermeniye muvâcehelerinde ikrâr ve takrîr-i kelâm edip hâlik olan babam mezbûr Murat’ın ceddim merkūm Murat ve ammilerim merkūmân Vartan ve Tordon ve ceddem mezbûre Bebeki yedlerinde olan muhallefâtından bi hasebi’l-irsi’ş-şer‘î bana âid ve râci‘ olan üç bin kırk akçe hisse-i şer‘iyyemi bi’t-tamâm ve’l-kemâl mezbûrûn yedlerinden alıp kabz edip babam hâlik-i merkūm Murat’ın mîrâsına müte‘allik mezbûrlar ile da‘vâ ve nizâ‘ım kalmamışdır eğer ba‘de’l-yevm husûs-ı mezbûra müte‘allik benden bi’l-asâle veya vekîlimden bi’l-vekâle da‘vâ ve nizâ‘ sudûr ederse [3a] lede’l-hükkâm-ı zevi’l-ihtirâm mesmû‘a ve makbûle olmaya dediklerinde mukırr-ı merkūm Nazar’ın vech-i meşrûh üzre cârî olan ikrârını el-mukarru lehü’l-merkūmûn Murat ve Vartan ve Tordon ve Bebeki vicâhen tasdîk ve şifâhen tahkīk edicek mâ hüve’l-vâki‘ gıbbe’t-taleb ketb olundu. Hurrire fî evâili Cemâziyelevvel li sene seb‘a ve erba‘în ve elf. Şuhûdü’l-hâl: Fahrü’l-eimme Ömer Efendi b. el-merhûm Abdülkādir Efendi, Fahrü’l-cüyûş Şâhin Çavuş b. Abdullah, Ali b. Abdullah er-Râcil, Mehmed Efendi el-İmâm, Papa Maşaş, Hırad v. Murat.