Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 70 Hüküm no: 22 Orijinal metin no: [3a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Ali’nin ev yerini Ali Bey b. Hasan’a sattığı Sâbıkan vilâyet-i Rumeli’nin Tepedelen kazâsına tâbi‘ Fatice nâm karyeden olup hâlâ medîne-i Üsküb’de ve Debbâğ Şâhin mahallesinde sâkin olan Hasan Bey b. Ali nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Ali Bey b. Hasan mahzarında bi’t-tav‘ ikrâr ve i‘tirâf edip karye-i mezbûrda vâki‘ iki tarafdan mezbûr Ali Bey mülkü ve iki tarafdan tarîk-i âm ile mahdûd ve mümtâz eşcâr-ı müsmire ve gayr-ı müsmireyi müştemil mülk menzil yerimi, cümle tevâbi‘ ve levâhıkı ile mezbûr Ali Bey’e fıddî nakd-i râyic fi’l-vakt iki bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr iki bin akçeyi mezbûr Ali Bey yedinden bi’t-tamâm ahz ve kabz edip mebî‘-i mezbûru mahallinde zabt ve tasarrufa müşterî-i mezbûr Ali Bey’i taslît eyledim ba‘de’l-yevm zikr olunan menzil yeri mezbûr Ali Bey’in mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde mukırr-ı mezbûr Hasan Bey’in minvâl-i muharrer üzre cârî olan ikrârı el-mukarru lehü’l-merkūm Ali Bey vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâlis aşer min Cemâziyelevvel li sene seb‘a ve erba‘în ve elf. Şuhûdü’l-hâl: Mustafa Çelebi b. Mehmed, Sinan b. Hasan, Mehmed Beşe b. Ferhad, Ali Beşe b. Abdullah, diğer Ali b. Abdullah, Ali Beşe b. Kasım el-Bostânî ve gayruhüm.