Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 71 Hüküm no: 23 Orijinal metin no: [3a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sinan Ağa b. Mehmed’in ev bağ ve eşyasını İbrahim Çavuş b. Yusuf’a sattığı Mahmiye-i İstanbul’da merhûme Haseki Sultan câmi‘-i şerîfi kurbunda sâkin fahrü’l-emâsil ve’l-a‘yân Sinan Ağa b. Mehmed tarafından bey‘-i âti’z-zikri ikrâra vekîl olup hasm-ı câhid mahzarında Kurd Beşe b. Abdullah ve Mehmed Beşe b. Kurd şehâdetleri ile şer‘an vekâleti sâbite olan Süleyman Bey b. Ömer mahfil-i kazâda işbu sâhibü’l-kitâb İbrahim Çavuş b. Yusuf mahzarında bi’l-vekâle ikrâr-ı tâm ve takrîr-i kelâm edip müvekkil-i mezbûr Sinan Ağa Havâss-ı Aliyye kazâsı müzâfâtından Terkos nâhiyesine tâbi‘ Hacı Mihaliç nâm karyede vâki‘ cevânib-i erba‘ası Mahmud Ağa ve Mehmed Bey mülkleri ve tarîk-i âm ile mahdûd olup çiftlik ta‘bîr olunur bir bâb tahtânî ve bir bâb fevkānî odaları ve bir ahırı ve iki anbar ve taş duvarı ve eşcâr-ı müsmire-i mütenevvi‘ayı muhteviye hadîkayı müştemil olan mülk menzilini, cümle tevâbi‘ ve levâhıkı ile ve hudûd-ı mezbûr dâhilinde vâki‘ bir kıt‘a mülk bağını ve menzil-i mezbûrda mevcûd olan iki çift kara sığır öküzü ve üç kara sığır ineği ve üç buzağı ve iki danayı ve mükemmel iki kıt‘a arabayı ve on kaz ve yirmi tavuğu ve bir sahan ve bir bakraç ve bir kaliçeyi bi safkatin vâhidetin mezbûr İbrahim Çavuş’a yirmi bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semeni olan mezbûrü’n-na‘t yirmi bin akçeyi yedinden bi’t-tamâm ve’l-kemâl ahz ve kabz eyledi ba‘de’l-yevm zikr olunan menzil ve bağ ve eşyâ-i merkūme müşterî-i mezbûr İbrahim Çavuş’un mülk-i müşterâsıdır, keyfe mâ yeşâ’ ve yahtâr mutasarrıf olsun dedikde vekîl-i mezbûrun ikrâr-ı meşrûhunu mesfûr İbrahim Çavuş vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Târihuhü’l-mezbûr. Şuhûdü’l-hâl: Halil Çelebi b. Sinan, el-Hâc Mahmud b. Hızır, Mehmed Ağa b. Hüseyin Ağa, Hüseyin Çelebi b. ( ) el-İmâm, diğer Hüseyin Çelebi b. İsmail el-Müezzin, Behram Beşe er-Râcil, Mehmed b. İbrahim, Mehmed b. Pîrî, Ali b. ( ), Mustafa Beşe b. Ali, Yakub b. Kurd, Mustafa b. Veli ve gayruhüm.