Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 72 Hüküm no: 24 Orijinal metin no: [3a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Abdullah’ın mallarının varisleri arasında paylaşılması Havâss-ı Aliyye kazâsı müzâfâtından Hasköy’de Turşucu Hüseyin Çelebi mahallesinde sâkin iken vefât eden Yusuf b. Abdullah nâm kimesnenin verâseti zevce-i metrûkesi ve vârisesi Peymâne bt. Abdullah ile sulbî kebîr oğlu Kenan’a münhasıra olduğu mütehakkik oldukdan sonra mezbûr Kenan mahfil-i kazâda işbu râfi‘atü’l-kitâb mezbûre Peymâne mahzarında ikrâr ve takrîr-i kelâm edip mûrisimiz müteveffâ-yı mezbûrun cümle muhallefâtı dört bin iki yüz on akçe olup meblağ-ı mezbûrun iki bin akçesini mezbûre Peymâne’nin iki bin akçe mehr-i müecceli için ba‘de’s-sübûti’ş-şer‘î ve’t-tahlîfi’l-mer‘î ihrâc eyleyip ve altı yüz akçesi dahi müteveffâ-yı mezbûrun techîz ve tekfîni ve sâir mesârif-i lâzımesiyçün ihrâc olunup li ecli’t-taksîm beynimizde bâkī kalan bin altı yüz on akçenin iki yüz on akçesi mezbûre Peymâne’ye sümün hisse-i şer‘iyyesi mukābelesinde verilip meblağ-ı bâkī bin akçesini dahi benim hisseme isâbet etmekle ben ahz ve kabz eyleyip mûrisimiz müteveffâ-yı mezbûrun muhallefâtına müte‘allik cemî‘ da‘vâdan birbirimizin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik min ba‘d da‘vâ ve nizâ‘ımız kalmadı ba‘de’l-yevm bir tarîk ile bi’z-zât ve bi’l-vâsıta da‘vâ sudûr ederse lede’l-hükkâm mesmû‘a ve makbûle olmaya dedikde mukırr-ı mezbûr Kenan’ın vech-i muharrer üzre cârî olan ikrârını mezbûre Peymâne vicâhen tasdîk ve tahkīk etmeğin mâ vaka‘a gıbbe’t-tasdîk ketb olundu. Fi’l-yevmi’l-âşir min Cemâziyelevvel li sene seb‘a ve erba‘în ve elf. Şuhûdü’l-hâl: Abdülkerim Efendi el-Kadı, Mehmed b. Süleyman, Mustafa b. Süleyman, Mustafa b. Musa, İbrahim Kethüdâ el-Hatîb, Mehmed Halîfe el-Müezzin, el-Hâc Mahmud Beşe, Mustafa Beşe, Mustafa b. Veli.