Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 204 Hüküm no: 188 Orijinal metin no: [24b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Numanzâde Abdurrahman Efendi’nin terekesinden kalan arsanın beytülmâl emîni tarafından el-Hâc İbrahim b. Mehmed’e satıldığı ve paranın hazine-i âmireye teslim edildiği Efendi hazretleri imzâsıyla Dârü’l-hilâfeti’l-aliyye Kostantıniyye el-mahmiyye’de şıkk-ı evvel defterdârı kāimmakāmı olan zü’l-kadri’r-refî‘ ve’l-câhi’l-menî‘ izzetlü Mehmed Paşa hazretleri dîvân-ı eyvân-ı adâlet-ünvânda ma‘kūd meclis-i şer‘-i hatîr-i lâzımü’t-tevkīrde işbu sâhibü’l-kitâb el-Hâc İbrahim b. Mehmed nâm kimesne mahzarında ikrâr ve i‘tirâf edip bundan akdem ordu-yı hümâyûnda vefât eden Numanzâde Abdurrahman Efendi’nin zâhirde vâris-i ma‘rûfu olmamağla terekesi beytülmâle âid olmağın tereke-i mezbûreden olup mahmiye-i mahkiyede Çoban Çavuş mahallesinde vâki‘ bir tarafdan yine tereke-i mezbûreden olan menzil ve bir tarafdan ba‘zen Çoban Çavuş vakfı ve ba‘zen tarîk-i âm ve bir tarafdan Hamza Çavuş mülkü ve bir tarafdan mezbûr el-Hâc İbrahim mülkü ile mahdûd etrâfında taş duvarı ve su kuyusunu müştemil mülk arsayı emânetim hasebiyle mîrî için kabz eylediğimden sonra li ecli’l-bey‘ sûk-ı sultânîde kirâren ve mirâren ba‘de’n-nidâ ve’l-müzâyede ve isre inkıtâ‘i’r-rağbe üç yüz otuz beş kıt‘a esedî guruşda mezbûr el-Hâc İbrahim üzerinde karâr edip ziyâde ile tâlib-i âhar zuhûr etme[me]ğin ben dahi arsa-i mahdûde-i mezbûreyi üç yüz otuz beş kıt‘a esedî guruş ile meclis-i akidde mevcûde ve müşârün-ileyhâ ve kabzım ile mukabbaza aded-i nâ ma‘lûm bir kabza fülûsa mezbûr el-Hâc İbrahim’e bey‘ ve teslîm edip ol dahi ber vech-i muharrer iştirâ ve tesellüm eyledikden sonra meblağ-ı mezbûr üç yüz otuz beş kıt‘a mezbûrü’n-na‘t guruşu mezbûr el-Hâc İbrahim yedinden bi’t-tamâm ve’l-kemâl alıp kabz edip teslîm-i hazîne-i âmire eyledim ba‘de’l-yevm zikr olunan arsa merkūm el-Hâc İbrahim’in mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Cumâdelûlâ li sene seb‘a ve seb‘în ve elf. Şuhûdü’l-hâl: Fahrü’l-akrân Muhzır Mustafa Ağa, fahrü’l-emâsil Fazlullah Ağa Kethüdâ-yı kapıcıyân, el-Hâc Mehmed b. Yunus, Abdullah Çelebi b. ( ) el-Haffâf, Receb Çelebi b. Abdullah, Mehmed Çelebi b. ( ) Dâmâd-ı Solakzâde, Hasan Ağa Vekîl-i harc, Mahmud Ağa b. Abdullah, Şaban Ağa b. Kemal Muhzırbaşı, Ali Beşe b. Mehmed Çukadâr.