Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 80 Hüküm no: 37 Orijinal metin no: [5a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Niko v. Papa Duka’nın evini Dimo v. Diyo’ya sattığı Vilâyet-i Rumeli’nde Ergirikasrı kazâsına tâbi‘ Lotoşta nâm karye sâkinlerinden Niko v. Papa Duka nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Dimo v. Diyo nâm zimmî muvâcehesinde bi’t-tav‘ ikrâr ve i‘tirâf edip karye-i mezbûrede vâki‘ bir tarafdan Kiti v. Duka ve bir tarafdan Duka v. Yani mülkü ve bir tarafdan Seyran Çavuş mülkü ve bir tarafdan Duka v. Yani tarlası ile mahdûd ve mümtâz bir bâb fevkānî beyti ve altında ahırı ve zât-ı eşcâr-ı müsmire ve gayr-ı müsmire muhavvatayı ve harman yerini müştemil mülk menzilimi mezbûr Dimo’ya fıddî nakd-i râyic fi’l-vakt iki bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ve safka-i vâhide ile bey‘ edip ol dahi vech-i meşrûh üzre iştirâ ve kabûl eyledikden sonra semeni mezbûr iki bin beş yüz akçeyi mezbûr Dimo yedinden tamâmen alıp kabz [edip] mebî‘-i mezbûru mahallinde zabt ve tasarrufa müşterî-i mezbûr Dimo’yu taslît eyledim ba‘de’l-yevm zikr olunan menzil Dimo’nun mülk-i müşterâsı olmuşdur, [keyfe mâ] yeşâ’ ve yahtâr mutasarrıf olsun dedikde mukırr-ı mezbûr Dimo’nun minvâl-i muharrer üzre cârî olan ikrârını el-mukarru lehü’l-merkūm Dimo vicâhen tasdîk ve şifâhen tahkīk edicek mâ hüve’l-vâ[ki‘] gıbbe’t-taleb ketb olundu. Hurrire fi’l-yevmi’s-sâmin aşer min Cemâziyelevvel li sene seb‘a ve erba‘în ve elf. Şuhûdü’l-hâl: Ali b. Mustafa, Mustafa b. Veli, Cafer b. Abdullah, Harkop v. Niko, Yani v. Papa Duka, Duka [v.] Yani, Duka [v.] Dimo, Yorgo v. Kiti, Niko [v.] Kiti, Niko [v.] Danyal, Paroş [v.] Nikola, Duka v. Yani, Yorgo [v.] Yani.