Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 81 Hüküm no: 39 Orijinal metin no: [5a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe’nin mallarının varisleri arasında taksimi Mahmiye-i Kostantıniyye ebvâbından Topkapısı hâricinde vâki‘ merhûm Takyeci İbrahim Çavuş Câmi‘-i şerîfi mahallesinde sâkine iken bundan akdem fevt olan Âişe nâm müteveffânın verâseti zevc-i metrûkü Ali b. Mehmed ve babası Receb b. Abdullah nâm kimesneleri ve sagīre kızı Fâtıma’ya ve anası Zamâne bt. Abdullah nâm hâtuna mün[ha]sıra olup kable’l-kısme mezbûre Fâtıma dahi müteveffât olup verâseti babası mezbûr Ali’ye ve ceddesi mezbûre Zamâne’ye münhasıra oldukdan sonra merkūm Receb tarafından husûs-ı âti’z-zikre vekîl olup vekâleti Mustafa b. Mehmed ve Mehmed b. Mustafa nâm kimesneler şehâdetleriy[l]e sâbite olan oğlu İbrahim nâm kimesne mahfil-i kazâda râfi‘ü hâze’l-kitâb merhûm Ali muvâcehesinde bi’l-vekâle ikrâr ve i‘tirâf edip müvekkilim mezbûr Receb tarafından kızı müteveffât-ı merkūme Âişe’nin on üç sehme münkasim olan münâsahası mes’elesinden bi hasebi’l-irsi’ş-şer‘î kendiye isâbet eden iki sehim hissesi mukābelesinde zevci merkūm Ali yedinde olan yirmi dört bin akçe terekesinden üç bin otuz akçe hisse-i şer‘iyyesini merkūm Ali yedinden bi’t-tamâm vekâletim hasebiyle alıp kabz eyledim ba‘de’l-yevm bir akçe ve bir habbe hakkı kalmayıp kızı mezbûre Âişe’nin ve ba‘dehû müteveffât olan kızı mezbûre Fâtıma’nın minvâl-i sâbık üzre on üç sehme münkasim olan münâsahası mes’elelerinden bi hasebi’l-irsi’ş-şer‘î bana isâbet eden üç sehim hisse-i şer‘iyyem mukābelesinde merkūm Ali yedinde olan yirmi dört bin akçe terekelerinden beş bin beş yüz elli akçe hisse-i şer‘iyyemi mezbûr Ali yedinden bi tamâmihî ahz ve kabz eyledim ba‘de’l-yevm kızım mezbûre Âişe ve kızı merkūme Fâtıma’nın verâsetlerine müte‘allik bir akçe hakkım kalmayıp ve da‘vâ ve nizâ‘ım dahi yokdur deyicek vekîl-i merkūm İbrahim’in ve mukırra-i merkūme Zamâne’nin bi’l-vekâle ve bi’l-asâle cârî olan ikrâr-ı meşrûhları merkūm Ali vicâhen tasdîk edicek mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Osman Beşe b. Ahmed, Mustafa Beşe b. Abdullah, İbrahim Beşe b. Mustafa, Yakub b. Kurd.