Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 82 Hüküm no: 40 Orijinal metin no: [5b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Mehmed’in Cafer Paşa Vakfı’na borçlu olduğu Medîne-i Hazret-i Ebî Eyyûb el-Ensârî’de vâki‘ merhûm Cafer Paşa vakfı’na sâbıkan mütevellî olan Çene Mehmed Çelebi b. Mehmed mahfil-i kazâda vakf-ı mezbûra hâlâ mütevellî olan râfi’u hâze’l-kitâb Mehmed Beşe b. Hamza muvâcehesinde bi tav‘ihî ikrâr ve i‘tirâf edip vakf-ı mezbûr malından hâlâ zimmetimde târih-i kitâb şehri gurresinden yüz elli gün tamâmına müeccel vâcibü’l-edâ ve lâzımü’l-kazâ deynim olan otuz bin akçe mukābelesinde medîne-i mezbûre mahallâtından Takyeci Paşa mahallesinde vâki‘ bir tarafdan kızım Âişe nâm hâtun mülkü ve bir tarafdan İbrahim nâm kimesne mülkü ve bir tarafdan mezaristân ve taraf-ı râbi‘i tarîk-i âm ile mahdûd mülk-i mahzım olan menzilimi, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık rehin vaz‘ edip şe’n-i akāra sâlih olan vech üzre mütevellî-i mezbûr Mehmed Beşe’ye teslîm eyledim dedikde merkūm Mehmed Çelebi’nin vech-i meşrûh üzre cârî olan ikrârı mütevellî-i mezbûr Mehmed Beşe vicâhen tasdîk ve şifâhen tahkīk ettiğinden sonra menzil-i mezbûrun derkine işbu hâzır bi’l-meclis olan Ebûbekir Çavuş b. Mustafa nâm kimesne emr ve kabûlü hâviye kefâlet ile kefîl olmağın mâ hüve’l-vâki‘ gıbbe[’t-taleb] ketb olundu. Hurrire fi’l-yevmi’s-sâbi‘ aşer min Cemâziyelevvel li sene seb‘a ve erba‘în ve elf. Şuhûdü’l-hâl: Abdurrahman Çelebi b. Habib el-Hammâmî, İbrahim Çavuş b. Hasan, Sefer Halîfe b. Veli, Cafer b. Abdullah.