Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 205 Hüküm no: 189 Orijinal metin no: [25a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ölen es-Seyyid Eymir’in, alacağının vârislerce tahsil edildiği
Bi’l-fi‘l vilâyet-i Rumeli’nde medîne-i Hezargrad’da nâibü’ş-şer‘i’ş-şerîf olan es-Seyyid Abdullah Efendi b. Mustafa b. Beytullah’ın hat ve hatmini hâvî târih-i kitâb şehrinin dördüncü günü ile müverrah es-Seyyid Umurlu b. es-Seyyid Alemşah nâm kimesne yediyle nakl-i şer‘î vârid olup mazmûnu medîne-i Hezargrad müzâfâtından Ahmedçe nâm karye sükkânından olan es-Seyyid Umurlu b. es-Seyyid Alemşah nâm kimesneden vech-i âtî üzre da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra udûl-i ricâl-i müslimînden olup karye-i mezbûre sükkânından es-Seyyid Hasan b. es-Seyyid Fethullah b. Hüseyin ve es-Seyyid Umurlu b. Abdürrahim b. Abdurrahman nâm kimesneler nakl ve tahvîl için mahall-i cerh ve ta‘dîlde her biri edâ-i şehâdet-i şer‘iyye edip medîne-i Çorlu’da fevti mesmû‘umuz olan es-Seyyid Eymir müsteşhid-i mezbûr es-Seyyid Umurlu ile li ebeveyn karındaşlar olup babaları ismi es-Seyyid Alemşah ve dedeleri ismi es-Seyyid Hüseyin ve anaları ismi Elif bt. Fenâî ve maskat-ı re’sleri karye-i mezbûredir, müteveffâ-yı mezbûrun verâseti müsteşhid-i mezbûra münhasırdır, gayrı vâris ve terekesine âhar müstahık olduğu ma‘lûmumuz değildir, müsteşhid-i mezbûr için tereke-i müteveffâ-yı mezbûru vâzı‘ü’l-yed olanlardan hak taleb ve ahz vardır, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyet-i şerâiti’l-kabûl şehâdetleri makbûle olduğunu hâvî bulunmağın kitâb-ı merkūm mezbûr es-Seyyid Umurlu talebiyle kasab tâifesinden olup müteveffâ-yı mezbûra cihet-i karzdan otuz bin akçe ve yirmi keyl arpa bahâsından beş yüz akçe medyûnlar Mehmed Ağa b. Mustafa Ağa ile şerîkleri Dimitri v. Manol ve Yorgi v. Takyeci Yani zimmîler mahzarlarında feth ve kırâat ve istintâk olunduklarında her biri deyn-i mezbûru ikrâr ve lâkin kitâb-ı merkūm nâib-i mezbûr es-Seyyid Abdullah Efendi’nin kıbelinden vârid kitâbı zeylinde olan hat ve hatmi olduğunu inkâr ettiklerinde mezbûr es-Seyyid Umurlu’dan kitâb-ı merkūm nâib-i mezbûr es-Seyyid Abdullah Efendi’nin kıbelinden vârid kitâbı ve zeylinde olan hat ve hatmi dahi hat ve hatmi olduğunu mübeyyine beyyine taleb olundukda kitâb-ı mezbûrun zeylinde isimleri terkīm olunan şuhûd-ı tarîkden Ali b. İmankulu ve es-Seyyid Halil b. Ahmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka kitâb-ı mesfûr nâib-i mezbûr es-Seyyid Abdullah Efendi kıbelinden vârid kitâb ve zeylinde olan hat ve hatmi dahi hatm ve hattıdır, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olup mezbûr es-Seyyid Umurlu’nun verâsetine ba‘de’l-hükm meblağ-ı mezkûru mezbûr es-Seyyid Umurlu’ya edâya merkūmûn Mehmed Ağa ve Dimitri ve Yorgi mahzarlarında ikrâr ve i‘tirâf edip ânifen edâsına tenbîh olunan meblağ-ı mezbûr otuz bin beş yüz akçeyi mezbûrûn Mehmed Ağa ve Dimitri ve Yorgi yedlerinden alıp kabz eyledim dedikde gıbbe’t-tasdîki’ş-şer‘î mâ vaka‘a ketb olundu. Fi’l-yevmi’s-sânî ve’l-ışrîn min Cumâdelûlâ li sene seb‘a ve seb‘în ve elf.
Şuhûdü’l-hâl: Berber Yusuf Bey b. Abdullah, Nasuh Beşe b. Veli, Abdi Beşe b. Veli, Ahmed Beşe b. Veli.
|