Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 88 Hüküm no: 48 Orijinal metin no: [7a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Dimo’nun tarlasını Papa Paros v. Papa Apostol’e sattığı Vilâyet-i Rumeli’nde Yenişehir kazâsı müzâfâtından Kûhistan nâhiyesine tâbi‘ Gülcüz nâm karye sâkinlerinden Yani v. Dimo nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Papa Paros v. Papa Apostol nâm zimmî muvâcehesinde bi’t-tav‘ ikrâr ve i‘tirâf edip karye mezbûre hudûdu dâhilinde Rende nâm mevzi‘de vâki‘ bir tarafdan Dimo v. Angilaki tarlası ve etrâf-ı selâseden arz-ı hâliye ile mahdûd ve mümtâz olup taht-ı tasarrufumda olan tahmînen beş dönüm bir kıt‘a tarlamdan nısf-ı şâyi‘inin hakk-ı tasarruflarını sâhib-i arz ma‘rifetiyle Papa Paros’a fıddî nakd-i râyic fi’l-vakt iki bin sekiz yüz akçe mukābelesinde tefvîz edip ol dahi vech-i meşrûh üzre tefevvuz ve kabûl eyledikden sonra bedel-i tefvîz olan meblağ-ı mezbûr iki bin sekiz yüz akçeyi Papa Paros yedinden bi’t-tamâm ve’l-kemâl ahz ve kabz edip zikr olunan tarla ve çayırın nısf-ı şâyi‘ini mahallinde zabt ve tasarrufa mezbûr Papa Paros’u taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-ışrîn min Cemâziyelevvel li sene seb‘a ve erba‘în ve elf. Şuhûdü’l-hâl: Ali b. Mustafa, Mustafa b. Veli, Cafer b. Abd[ullah], Andriye [v.] Dimo, Papa Yani [v.] Papa Andriye, Todori [v.] Panayot, Bâli v. Apostol, Angilaki [v.] Papa Andriye, Dimo [v.] İstati ve gayruhüm.