Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 88 Hüküm no: 49 Orijinal metin no: [7a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Petro v. Nikola ile Körki v. Nikola arasındaki alacak davasının sulh ile sona ermesi Vilâyet-i Rumeli’nde Arnavud Belgradı nâm kasaba sâkinlerinden Petro v. Nikola nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Körki v. Nikolo nâm zimmî muvâcehesinde bi’t-tav‘i’s-sâf ikrâr ve i‘tirâf edip bundan akdem kazâ-i mezbûra tâbi‘ Bolani nâm karyede sâkine Benye bt. İstiyo nâm Nasrâniyeyi tezevvüc etmek ümîdi ile on altı guruş harc ve sarf etmiş idim mezbûr Körki mezbûre Benye’yi oğlu Nano nâm zimmîye alıvermek ile harc eylediğim on altı guruşu taleb eylediğimde beynimizde münâza‘ât-ı kesîre ve muhâsamât-ı adîde vâkı‘a olmuşidi el-hâletü hâzihî muslihûn tavassut edip mâbeynimizi üç yüz akçeye sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr üç yüz akçeyi mezbûr Körki yedinden tamâmen alıp kabz edip husûs-ı mezbûra müte‘allik da‘vâdan mezbûr Körki’nin zimmetini ibrâ ve iskāt eyledim ba‘de’l-yevm benim tarafımdan husûs-ı mezbûra müte‘allik da‘vâ dahi sudûr eder ise lede’l-hükkâmi’l-kirâm mesmû‘a olmasın dedikde gıbbe’t-tasdîki’ş-şer‘î mâ vaka‘a gıbbe’t-taleb ketb olundu. Fi’l-yevmi’l-hâdî ve’l-ışrîn min Cemâziyelevvel li sene seb‘a ve erba‘în ve elf. Şuhûdü’l-hâl: Ahmed Beşe b. Abdullah, Kara Yusuf b. Abdullah, Yakub b. Kurd, Dido v. ( ), Kosta v. Nikola, Hristo [v.] Dimo.