Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 89 Hüküm no: 50 Orijinal metin no: [7a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Yani’nin ev ve bağını Pavlo v. Dimo’ya sattığı Vilâyet-i Rumeli’nde Yenişehir kazâsı müzâfâtından Yeni Cum‘a nâhiyesine tâbi‘ Papa nâm karye sâkinlerinden Yorgi v. Yani nâm zimmî meclis-i şer‘-i şerîf-i lâzımü’t-teşrîfde işbu hâmilü’s-sifr Pavlo v. Dimo nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Yani v. Paro mülkü ve bir tarafdan Toraso v. Papa Yani mülkü ve bir tarafdan Vetro v. Milo ve bir tarafdan tarîk-i âm ile mahdûd ve mümtâz olup bir bâb tahtânî beyti ve muhavvatayı müştemil olan mülk menzilimi ve hudûd-ı mezbûr dâhilinde vâki‘ bir kıt‘a mülk bağımı mezbûr Pavlo’ya fıddî nakd-i râyic fi’l-vakt iki bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘i ile bey‘ edip ol dahi vech-i meşrûh üzre iştirâ ve kabûl eyledikden sonra semen-i mezbûr iki bin akçeyi mezbûr Pavlo yedinden tamâmen ahz ve kabz edip zikr olunan menzil ve bağı mahallinde zabt ve tasarrufa mezbûr Pavlo’yu taslît eyledim ba‘de’l-yevm zikr olunan menzil ve bağı mezbûr Pavlo’nun mülk-i müşterâsı olmuşdur dedikde gıbbe’t-tasdîki’ş-şer‘î mâ vaka‘a ketb olundu. Tahrîren fi’l-yevmi’s-sâlis ve’l-ışrîn min Cemâziyelevvel li sene seb‘a ve erba‘în ve elf. Şuhûdü’l-hâl: İbrahim Beşe b. Abdullah, Mustafa b. Veli, Cafer b. Abdullah, Yani [v.] Pavlo, Yani [v.] Lanbo, Yani [v.] Rizo, Yani [v.] Andriye.