Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 89 Hüküm no: 51 Orijinal metin no: [7a-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çelebi b. Mehmed’in evini istiğlâl yoluyla Perviz Efendi Vakfı’na sattığı Ebî Eyyûb el-Ensârî mahallâtından Ali Paşa mahallesinde sâkin olan İbrahim Çelebi b. Mehmed nâm kimesne meclis-i şer‘-i şerîfde hâzır olup âtiyyü’z-zikr menzilini, merhûm Perviz Efendi vakfı’na mütevellî olan hâmil-i hâze’l-kitâb Halil Halîfe b. Mehmed’e bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr malıyla ve istiğlâl maksadıyla, mezbûr İbrahim Çelebi’nin işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i merkūmede vâki‘, bir tarafdan İlyas mülkü, diğer tarafdan Abdülkerim mülkü, öteki tarafdan tarîk-i hâs ve diğer tarafdan da tarîk-i âm ile mahdûd bulunan cemî‘-i menzilini cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt dört bin akçe semen-i mu‘ayyen-i makbûzla ondan iştirâ etti. Bâyi‘-i mezbûrun menzili kirâlamak istemesi üzerine mütevellî-i merkūm, ba‘de’t-tahliyye ve’t-tekābuz zeylde mezkûr ayın gurresinden üç sene tamâmına bin sekiz yüz akçe ücret ile menzil-i mezbûru kirâya verdi. Mütevellî-i mezbûr vâki‘ ikrârı vicâhen ve şifâhen tasdîk etti. Sonra mahalle-i merkūmede sâkin olan, mukırr-ı mezbûrun ana baba bir karındaşı Abdülkerim b. Mehmed, menzil-i mezbûrun derkine, ücret-i kirâya ve asl-ı meblağ-ı mezbûra îcâb ve kabûlü hâvî kefâlet ile kefîl oldu. Cerâ zâlike ve hurrire fi’l-yevmi’s-sâlis ve’l-ışrîn min Cumâdelûlâ sene seb‘a ve erba‘în ve elf. Şuhûdü’l-hâl: İsmail Çelebi b. Mehmed, Veli Halîfe b. Abdünnebi, Şaban Halîfe b. Kenan, Hüseyin Çelebi b. Eyüb, Mehmed b. Murtaza, Ali b. Mustafa, Mustafa b. Hasan, Cafer b. Ali