Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 90 Hüküm no: 52 Orijinal metin no: [7b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Safiye bt. Abdullah ve kocasının evlerini Emine Hatun bt. Kurd’a sattığı Medîne-i Hazret-i Ebî Eyyûb el-Ensârî mahallâtından Ali Paşa-yı Atîk mahallesinde sâkine Safiye bt. Abdullah nâm hâtun tarafından bey‘-i âti’z-zikri ve kabz-ı semeni ikrâra vekîl olup hasm-ı câ[hid] mahzarında mezbûreyi ma‘rifet-i şer‘iyye ile ârifeyn olan Mustafa Çelebi b. Veli ve Mehmed Efendi b. Yusuf şehâdetleri ile şer‘an vekâleti sâbite olan İbrahim Beşe b. Hüseyin nâm râcil ile mezbûre Safiye’nin zevci Mustafa Beşe b. Abdullah nâm kimesne mahfil-i kazâda işbu hâmiletü’l-kitâb Emine Hâtun bt. Kurd Çavuş mahzarında her biri ikrâr ve i‘tirâf edip medîne-i mezbûre mahallâtından Düğmecibaşı mahallesinde vâki‘ bir tarafdan Fazlullah Halîfe mülkü ve bir tarafdan Belkıs Hâtun mülkü ve bir tarafdan Sirâceddin Efendi mülkü ve bir tarafdan tarîk-i hâs ile mahdûd iki bâb tahtânî ve altında bir mahzeni ve kenîfi ve muhavvatayı müştemil olup zevce-i mezbûre Safiye Hâtun ile ale’l-iştirâki’s-seviy mülkümüz olan menzili, cümle tevâbi‘ ve levâhıkı ile mezbûre Emine Hâtun’a fıddî nakd-i râyic fi’l-vakt yedi bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semeni olan meblağ-ı merkūm yedi bin akçeyi zevcem mezbûre Safiye Hâtun ile ma‘an ahz ve kabz eyledik. Ba‘de’l-yevm menzil merkūme Emine’nin mülk-i müşterâsı olmuşdur, keyfe mâ yeşâ’ ve tahtâr mutasarrıfa olsun dediklerinde merkūm Mustafa Beşe’nin ve vekîl-i mersûm İbrahim Beşe’nin vech-i muharrer üzre cârî ve sâdır olan ikrâr ve i‘tirâflarını merkūme Emine Hâtun vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâmin ve’l-ışrîn min Cemâziyelevvel li sene seb‘a ve erba‘în ve elf. Şuhûdü’l-hâl: Mustafa Efendi b. Mehmed el-Kâtib, Mustafa Beşe b. Mehmed el-Muhtesib, Mustafa Beşe b. Mahmud Çukadâr, Mustafa b. Veli, Ömer Beşe b. Mustafa, Cafer b. Abdullah, muharrirü’l-hurûf Abdülkādir el-Eyyûbî.