Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 91 Hüküm no: 53 Orijinal metin no: [7b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kurd Beşe b. Abdullah’ın Osman Bey b. Abdullah’a borcu olduğu Husûs-ı âti’l-beyânın mahallinde ketb ve tahrîri için savb-ı şer‘-i kavîmden mevlânâ Mustafa Efendi irsâl olunup ol dahi Havâss-ı Refî‘a kazâsı müzâfâtından Terkos nâhiyesine tâbi‘ Yassıviran nâm karyeye varıp zeyl-i kitâbda muharrerü’l-esâmî olan müslimîn mahzarlarında akd-i meclis-i şer‘-i mübîn eyledikde karye-i mezbûre sükkânından Kurd Beşe b. Abdullah nâm râcil mahfil-i kazâda râfi‘ü hâze’l-kitâb Osman Bey b. Abdullah muvâcehesinde bi tav‘ihî ikrâr ve i‘tirâf edip merkūm Osman Bey’in zevcesi olup karındaşım kızı olan Hatice nâm hâtun karye-i mezbûrede vâki‘ altı sene zabt ve tasarrufunda olan çiftliğinin hayvânâtından bey‘ eylediğim hayvânâtın bahâsı olup zimmetimde mütekarrir olan dokuz bin akçeyi ve sinîn-i merkūmede çiftlik-i merkūmun hâsıl olan mahsûlâtını ve otuz beş bin akçe dahi benden da‘vâ ve taleb edip beynimizde münâza‘ât-ı kesîre ve muhâsamât-ı şedîde ve ekîde vâki‘ olmağın muslihûn tavassut edip mâbeynimizi zikr olunan dokuz bin akçe üzerine sulh eylediklerinde ben dahi sulh-i mezbûru kabûl edip bedel-i sulh olan meblağ-ı merkūm dokuz bin akçeyi zevci merkūm Osman Bey’den istikrâz ve kabz eylediğimden sonra mezbûre Hatice Hâtun’a edâ ve teslîm eyledim ba‘de’l-yevm zikr olunan dokuz bin akçe ki te’kîden li aslihî ve tavzîhan li küllihî nısfı dört bin beş yüz akçe eder merkūm Osman Bey’e vâcibü’l-edâ ve lâzımü’l-kazâ deynimdir dedikde mukırr-ı merkūm Kurd Beşe’nin ikrâr-ı meşrûhunu el-mukarru lehü’l-merkūm Osman Bey vicâhen tasdîk ve şifâhen tahkīk eylediğini mevlânâ-yı mezbûr mahallinde ketb ve tahrîr ba‘dehû gelip meclis-i şer‘de alâ vukū‘a ihbâr ve takrîr etmeğin mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sâdis ve’l-ışrîn min Cemâziyelevvel li sene seb‘a ve erba‘în ve elf. Şuhûdü’l-hâl: Mustafa Efendi b. Mehmed el-İmâm, Ali Halîfe b. Mustafa el-Müezzin, Habib Beşe b. Kasım er-Râcil, Mehmed Çelebi b. Osman, Murtaza Kethüdâ, Mustafa b. Abdullah, Ömer b. Abdullah, Rüstem Beşe b. Abdullah, Ahmed b. Mustafa, Hasan b. Abdullah, Ahmed b. Mehmed, Hüseyin b. Ali?.