Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 92 Hüküm no: 54 Orijinal metin no: [7b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi’nin tarlasını Androni v. Polihroni’ye devrettiği Vilâyet-i Rumeli’nde cezîre-i Mora’da Kartine kazâsına tâbi‘ Laste nâm karye sâkinlerinden Mehmed Çelebi b. Hüseyin Çavuş nâm kimesne meclis-i şer‘-i hatîr-i lâzımü’t-tevkīrde kazâ-i mezbûra tâbi‘ Graniçe nâm karye sâkinlerinden işbu hâmilü’s-sifr Androni v. Polihroni nâm zimmî muvâcehesinde ikrâr ve i‘tirâf edip mezbûr Androni’ye tasarrufumda olan tarlalarımdan vilâyet-i mezbûrede Trapoliçe kazâsına tâbi‘ Kamiçe nâm karye sınırı dâhilinde Bulakna nâm mevzi‘de vâki‘ bir tarafdan Mehmed b. Abdullah tarlası ve bir tarafdan Zülfikār b. Süleyman ve bir tarafdan Todori tarlası ve bir tarafdan Nikola v. Duka tarlası ile mahdûd olup üç keyl tohum istî‘âb eder bir dip armut ağacını müştemil tahmînen dört [8a] dönüm bir kıt‘a tarlamın hakk-ı tasarrufunu, sâhib-i arz ma‘rifetiyle iki bin akçe mukābelesinde tefvîz edip ol dahi tefevvuz ve kabûl eyledikden sonra bedel-i tefvîz olan meblağ-ı mezbûr iki bin akçeyi mezbûr Androni yedinden tamâmen alıp kabz edip mârrü’z-zikr olan tarlayı mahallinde zabt ve tasarrufa mezbûr Androni’yi taslît eyledim dedikde gıbbe’t-tasdîk mâ vaka‘a ketb olundu. Tahrîren fi’l-yevmi’s-sâmin ve’l-ışrîn min Cemâziyelevvel li sene seb‘a ve erba‘în ve elf. Şuhûdü’l-hâl: Baba Yusuf Bey b. Abdullah, Mehmed b. Memi, Ahmed Bey b. Emrullah, Eyüb Çelebi b. Yusuf, Cafer b. Abdullah ve gayruhüm.