Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 92 Hüküm no: 55 Orijinal metin no: [8a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Baruthâne çalışanlarından Süleyman b. Hasan’ın Receb b. Hasan’a olan borcunu ödemesi Mîrî Baruthâne hüddâmından râfi‘ü’l-kitâb Receb b. Hasan nâm kimesne meclis-i şer‘de, yine Baruthâne hüddâmından Süleyman b. Hasan nâm acemî mahzarında üzerine takrîr-i da‘vâ edip mezbûr Süleyman’ın babası Hasan zimmetinde bârgir bahâsından dokuz aded riyâlî guruş ve karz-ı şer‘îden üç yüz otuz akçe hakkım olup mezbûr Hasan târih-i kitâbdan bir sene mukaddem Rumeli’ne gider iken meblağ-ı mezbûru taleb eylediğimde meblağ-ı mezbûr dokuz riyâlî guruş ve üç yüz otuz akçeye oğlu mezbûr Süleyman tarafından îcâb ve kabûlü hâviye kefâletle kefîl bi’l-mâl olmuşidi hâlâ kefâlet-i mahkiyesi hasebiyle mezbûr Süleyman’dan taleb ederim dedikde gıbbe’s-suâl ve akībe’l-inkâr müdde‘î-i mezbûrun müdde‘âsına mutâbık beyyine taleb olundukda ityân-ı beyyineden izhâr-ı acz edip istihlâf etmeğin mezbûr Süleyman yemînden nükûl etmeğin meblağ-ı mezbûr dokuz aded riyâlî guruş ile üç yüz otuz akçeyi mezbûr Receb’e edâ etmeye mezkûr Süleyman’a tenbîh olunup mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Mustafa Beşe b. Mehmed, Mustafa b. Mahmud, Yakub b. Kurd, Cafer b. Abdullah.